នៅពេលព្រឹកថ្ងៃទី០១ ខែសីហា ឆ្នាំ២០២១ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានអញ្ជើញប្រកាសបើកយុទ្ធនាការចាក់វ៉ាក់សាំងជូនកុមារ និងយុវវ័យ អាយុ១២ ដល់ ក្រោម១៨ឆ្នាំ។ ដោយឡែកនៅក្នុងកម្មវិធីនេះដែរ សម្តេចក៏បានបញ្ជាក់ច្បាស់ៗពីប្រភេទវ៉ាក់សាំងដែលត្រូវចាក់ជូនប្រជាពលរដ្ឋនៅដូសទី៣។

យោងតាមសម្ដេច ហ៊ុន សែន បានមានអនុសាសន៍ សម្រាប់បុគ្គលណាដែលបានចាក់វ៉ាក់សាំងស៊ីណូវ៉ាក់ និងវ៉ាក់សុំាងស៊ីណូហ្វាមដូសទី ១ និងទី ២ រួចហើយ បុគ្គលនោះនឹងត្រូវចាក់វ៉ាក់សាំង Astrazeneca បន្តទៀតនៅដូសទី៣។ ដោយឡែក ចំពោះបុគ្គលណាដែលបានចាក់វ៉ាក់សាំង  Astrazeneca ដូសទី១ និងទី ២ រួចហើយ បុគ្គលនោះនឹងត្រូវចាក់វ៉ាក់សាំងស៊ីណូវ៉ាក់ និងវ៉ាក់សុំាងស៊ីណូហ្វាមនៅដូសទី៣។ 

ដូច្នេះ ឆ្លៀតក្នុងឱកាសនេះ សូមជម្រាបជាថ្មីថា បីទោះបីជា អ្នកទាំងអស់គ្នាបានចាក់វ៉ាក់សុំាងរួចក្ដី ប៉ុន្តែនៅតែបន្ថការពារខ្លួនដោយអនុវត្តនូវវិធានការការពាររបស់សម្ដេចតេជោ ហ៊ុន សែនគឺ “៣កុំ និង៣ការពារ”!

‑ត្រូវអនុវត្ត វិធានការ ៣ការពារជាប់ជាប្រចាំ៖

១៖ត្រូវលាងដៃឱ្យបានញឹកញាប់ជាមួយសាប៊ូ និងទឹកស្អាត ឬទឹកអាកុល ឬអាកុលដែលឱ្យបានលើសពី២០ដង ក្នុងមួយថ្ងៃ។

២៖ត្រូវពាក់ម៉ាស់ ត្រូវខ្ទប់មាត់ និងច្រមុះ នៅពេលក្អក កណ្ដាស់ ដោយប្រើម៉ាស់ ប្រើកែងដៃ ឬប្រើក្រដាសជូត មាត់ ហើយត្រូវបោះចោលក្នុងធុងសំរាមបិទជិតត្រឹមត្រូវ។

៣៖ត្រូវរក្សាគម្លាតសុវត្ថិភាពបុគ្គលឱ្យបានយ៉ាងតិច ១.៥ ម៉ែត្រឡើង ទៅពីម្នាក់ទៅម្នាក់។

‑ត្រូវអនុវត្តវិធានការ ៣កុំ៖

១៖កុំទៅកន្លែងដែលមានមនុស្សម្នាច្រើនកុះករ ឬការជួបជុំគ្នាច្រើន ឬពិធីដែលមានមនុស្សច្រើនពេក។

២៖កុំទៅកន្លែងដែលបិទជិតឈឹង មិនមានខ្យល់ចេញចូលគ្រប់គ្រាន់ ហើយប្រើម៉ាស៊ីនត្រជាក់ច្រើនពេក។

៣៖កុំប៉ះពាល់គ្នា កុំចាប់ដៃគ្នា កុំឱបគ្នា កុំកៀកស្មាគ្នា នៅពេលជួបភ្ញៀវ ជាពិសេសនៅកន្លែងដែលមានមនុស្ស និយាយគ្នាច្រើន ហើយស្ថិតនៅជិតគ្នាពេក ហើយត្រូវប្រើវិធីសំពះគ្នាលើកដៃជាសញ្ញា ឬងក់ក្បាលជាដើម និងត្រូវរក្សាចម្ងាយពីគ្នាមួយម៉ែត្រកន្លះឡើងទៅ៕

អត្ថបទដោយ៖ ម៉ាង វិសិដ្ឋារតន៍