មន្រ្តីជំនាញក្រសួងសុខាភិបាល ប្រកាសឱ្យឪពុកម្តាយដែលមានកូនតូចៗ បង្កើនការប្រុងប្រយ័ត្នឱ្យបានខ្ពស់ ព្រោះជំងឺគ្រុនឈាមក្នុងឆ្នាំនេះមានចំនួនកើនឡើងខ្លាំង ដោយគិតត្រឹមរយៈពេល ៤ខែនៃឆ្នាំ២០២២ កម្ពុជាបានរកឃើញក្មេងឆ្លងជំងឺគ្រុនឈាមជាង ៦០០នាក់ហើយ។
យោងតាមការចុះផ្សាយរបស់ក្រសួងព័ត៌មានចុះថ្ងៃទីទី៦ខែឧសភាឆ្នាំ២០២២បានឱ្យដឹងថាតាមប្រសាសន៍ លោកវេជ្ជបណ្ឌិត លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាល បានមាន ប្រសាសន៍ថា ខេត្តប្រឈមជាមួយនឹងជំងឺគ្រុនឈាមនេះច្រើនជាងគេមានដូចជា រាជធានីភ្នំពេញ ខេត្តកណ្តាល សៀមរាប កំពង់ស្ពឺ កំពង់ធំ និងខេត្តកំពង់ចាម ។ ជាមួយគ្នានេះ មន្ត្រីសុខាភិបាលក៏បានចាប់ផ្តើមធ្វើសកម្មភាព នៅក្នុងការចុះដាក់ថ្នាំអាបែត(ថ្នាំសម្រាប់កម្ចាត់ដង្កូវទឹក)ជាបន្តបន្ទាប់ នៅតាមបណ្ដាខេត្តទាំងនោះ ដើម្បីទប់ស្កាត់ការឆ្លង និងការកកើតមូសខ្លា ដែលជាភ្នាក់ ងារចម្លងជំងឺគ្រុនឈាម។
ជាមួយគ្នាផងដែរ លោកវេជ្ជបណ្ឌិត បន្តថារដូវវស្សាបានចូលមកដល់ មានភ្លៀងធ្លាក់ច្រើនជាហូរហែជាឱកាសមួយធ្វើឱ្យសត្វមូសខ្លាកើតកាន់តែខ្លាំង និងកាន់តែច្រើន ហើយជំងឺគ្រុនឈាមកើតមានច្រើនឡើងផងដែរ ដូចនេះសូមប្រជាពលរដ្ឋទាំងអស់ ត្រូវប្រុងប្រយ័ត្នចំពោះកូនតូចៗ ដោយកុំទុកឱ្យកូននៅតែម្នាក់ ឯង ឬក៏គេងដោយមិនបានដាក់មុង ជាពិសេសគឺចាប់ពីម៉ោង៦ព្រឹក ដល់ម៉ោង ៦ល្ងាច ព្រោះចន្លោះពេលនេះគឺជាពេលដែលសត្វមូសខ្លាចេញខាំ។
តាមប្រភពដដែលបានបញ្ជាក់ថា រយៈពេលបួនខែដើមឆ្នាំនេះ គឺយើងមានជាង ៦០០ករណី ហើយស្លាប់១ ករណី ប៉ុន្មានខែនេះយើងមើលទម្រង់វាច្រើនមែន ប៉ុន្តែទោះជាយ៉ាងណាក្ដី យើងនៅតែមានការប្រុងប្រយ័ត្នជាប់ជានិច្ច ភ្លៀងវាចេះតែមានច្រើន យើងដឹងស្រាប់ហើយជំងឺគ្រុនឈាមនេះគឺវាពាក់ព័ន្ធទៅនឹងកត្តាអាកាសធាតុ និងភ្លៀង អ៊ីចឹងសុំឱ្យប្រជាជនយើងទាំងអស់ប្រុងប្រយ័ត្ន ឧស្សាហ៍លាងពាង យើងមានភ្នាក់ងារសុខាភិបាល គាត់ដាក់អាបែត គឺនៅចាំឱ្យគេដាក់អាបែត ឱ្យបានត្រឹមត្រូវ បើមានសម្បកកង់ឡាន កង់ម៉ូតូ នៅក្រៅផ្ទះគឺយកវាចេញ កុំឱ្យទឹកភ្លៀងមកដក់វាកើតជាដង្កូវទឹក ហើយបើមាននរណាម្នាក់ដែលមានការសង្ស័យ ក្តៅខ្លួន អាចមានជំងឺគ្រុនឈាមគឺយកមកពេទ្យជាបន្ទាន់ ។អ៊ីចឹងយើងត្រូវតែប្រុងប្រយ័ត្នជំងឺគ្រុន ឈាម ដែលមានឱកាសកើន ឡើងគ្រប់ពេលវេលាទាំងអស់ ហើយជាធម្មតាវាអាចកើត ឡើង២ទៅ៣ដងជាធម្មតា នៅក្នុងរដូវវស្សា ។
អត្ថបទដោយ ៖ ជុជ ណាឃីម