នាយកដ្ឋានគ្រប់គ្រងជំងឺ(DDC)របស់ថៃ បានព្រមានថា ប្រទេសថៃបានចុះបញ្ជីអ្នកជំងឺគ្រុនឈាមចំនួន ១៥,៣៩៩នាក់មកទល់ពេលនេះ ហើយចំនួននេះត្រូវបានគេរំពឹងថានឹងកើនឡើងក្នុងរដូវវស្សា នេះបើតាមការឱ្យដឹងពីប្រភពThe Nation នៅថ្ងៃទី២៩ ខែឧសភា ឆ្នាំ២០២៣។

លោកវេជ្ជបណ្ឌិត Tares Krassanairawiwong អគ្គនាយកCDC បានឱ្យដឹងថាចំនួនអ្នកជំងឺដែលកំពុងកើតមានជាចំនួនដ៏ច្រើន បើប្រៀបធៀបកាលពីឆ្នាំមុនមានតែអ្នកជំងឺគ្រុនឈាមចំនួន ២,៩៤២ នាក់ប៉ុណ្ណោះ។ ខេត្តរបស់ប្រទេសថៃដែលកើតជំងឺគ្រុនឈាមច្រើនជាងគេមាន ខេត្ត​ណាន ខេត្តត្រាត ខេត្តជុំផុន ខេត្តចន្ថាបុរី និងខេត្ត​តាក។

ប្រភពដដែលបានបន្តថា ទឹកដែលដកនៅតាមតំបន់ដែលមានប្រាសាទ សាលារៀន ជាប្រភពទីកន្លែងដែលមូសបង្កាត់ពូជ ហើយកុមារដែលមានអាយុលើសពី៥ឆ្នាំគឺប្រឈមមុខនឹងកើតជំងឺគ្រុនឈាមញឹកញាប់បំផុត។ ការរីករាលដាលនៃជំងឺគ្រុនឈាមអាចមានភាពតឹងរ៉ឹងជាងមុន ក្នុងការទប់ស្កាត់នៅពេលនេះ ព្រោះប្រទេសថៃបានចូលដល់រដូវវស្សាហើយ។ លោក​បាន​បន្ថែម​ថា មធ្យោបាយ​តែ​មួយ​គត់​ដែល​អាច​ដោះស្រាយ​បាន គឺ​ប្រសិន​បើ​គ្រប់​ស្ថាប័ន​មាន​វិធានការ​បង្ការ​គ្រប់​ជ្រុងជ្រោយ។

គួរបញ្ជាក់ដែរថា DDCថៃ សង្ឃឹមថា ខ្លួននឹងអាចទប់ស្កាត់ចំនួនករណីជំងឺគ្រុនឈាមក្នុងអំឡុងរដូវវស្សាពីខែមិថុនា ដល់ខែសីហា ក្រោមកម្រិតមធ្យមរយៈពេលប្រាំឆ្នាំ និងរក្សាអត្រាមរណភាពមិនឱ្យលើសពី ០.១០% នៅឆ្នាំនេះ៕

អត្ថបទដោយ៖ Senghong