យោងតាមការផ្សាយរបស់ក្រសួងធនធានទឹក និងឧតុនិយម នៅថ្ងៃទី ៤ ខែឧសភា ឆ្នាំ២០២១ បានឱ្យដឹងថា ជ្រលងនៃសម្ពាធទាបឥណ្ឌា និងខ្យល់មូសុងនិរតី រំកិលគ្របដណ្ដប់បក់មកលើប្រទេសកម្ពុជា ។

ទន្ទឹមនឹងរដូវវស្សាឆ្នាំ២០២១ និងឈានចូលមកដល់នៅពេលដ៏ខ្លីខាងមុខនេះក្រសួងបានបញ្ជាក់ពីស្ថានភាពអកាសធាតុចាប់ពីថ្ងៃទី៥រហូតដល់ថ្ងៃទី១១ ខែឧសភា ឆ្នាំ២០២១ថា នឹងអាចធ្លាក់ភ្លៀងក្នុងកម្រិតពីមធ្យមទៅច្រើន ។

តាមការបញ្ជាក់របស់ប្រភពដដែលបានសង្កត់ធ្ងន់ថា “អាស័យស្ថានភាពធាតុអាកាសដូចបានជម្រាបជូនខាងលើ សូមសាធារណជនជ្រាបជាព័ត៌មាន និងសូមបន្ត ប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចកើតមាន ជាពិសេសបណ្តាខេត្តនៅតំបន់វាល ទំនាបកណ្តាល “។

តាមការឱ្យដឹងរបស់ក្រសួងបានឱ្យដឹងដែរថា កាលពីថ្ងៃទី៣ ខែឧសភា ឆ្នាំ២០២១ ល្ងាច វេលាម៉ោង ៥:១០នាទី មានភ្លៀងធ្លាក់កម្រិតមធ្យមទៅបង្គួរ លាយឡំនិងខ្យល់កន្រ្តាក់បានបណ្តាលឲ្យខូចខាតផ្ទះប្រជាពលរដ្ឋ ស្ថិតនៅស្រុកស្វាយចេក ខេត្តបន្ទាយមានជ័យ។

គួររំលឹកដែរថា រដូវវស្សាឆ្នាំនេះក៏ជិតមកដល់ហើយ ហេតុនេះសូមប្រជាជនយើងបង្កើនការប្រុងប្រយ័ត្នចំពោះ ការបង្កគ្រោះថ្នាក់ផ្សេងៗជាយថាហេតុនៃអាកាសធាតុ ដែលអាចកើតមានគ្រប់ពេលវេលា ពិសេសលើសុខភាពផងដែរ ព្រោះវាជាឱកាសនៃការបង្កនិងចម្លងជំងឺផ្សេងៗផងដែរ។

សូមអានសេចក្ដីប្រកាសលម្អិតខាងក្រោមបន្ថែម៖