ផ្អែកតាមការចែករំលែកពីលោកDeepti Lokesappa ជាអ្នកស្រាវជ្រាវចំណីអាហារនិងអាហារូបត្ថម្ភ បានថ្លែងប្រាប់គេហទំព័រHealthshots ថាអាហារពេលព្រឹកសំខាន់ណាស់ក្នុងការផ្ដល់ថាមពលដល់រាងកាយពេញមួយថ្ងៃ។ បើអ្នកទទួលអាហារពេលព្រឹកខុស នឹងធ្វើឱ្យអ្នកមានអារម្មណ៍ល្វើយ ងងុយគេង ឆ្អែតពេក ធ្ងន់ខ្លួន គ្មានកម្លាំងគ្មានថាមពលទៅវិញ។

ហេតុនេះអ្នកគួរចៀងវាងប្រភេទអាហារដែលសម្បូរជាតិផ្អែម មានជាតិម្សៅច្រើន សម្បូរកាបូនអ៊ីដ្រានច្រើនពេក ជាតិប្រៃ ខ្លាញ់ និងសារធាតុរក្សាទុកបានយូរ។ ប្រភេទអស់ទាំងនេះ ទទួលទានច្រើនពី១ថ្ងៃទៅ១ថ្ងៃ នឹងធ្វើឱ្យសុខភាពរបស់អ្នកធ្លាក់ចុះជាលំដាប់ ងាយនឹងមានជំងឺផ្សេងៗ។ តាមការសិក្សាបានរកឃើញថា សារធាតុចិញ្ចឹមដែលមាននៅក្នុងបន្លែនិងផ្លែឈើស្រស់ គ្រាប់ធញ្ញជាតិ មានសមត្ថភាពកាត់បន្ថយហានិភ័យនៃជំងឺមហារីកបាន។ ខាងក្រោមនេះជាគំរូអាហារពេលព្រឹកទាំង៣ ជ្រើសញ៉ាំពេលព្រឹក ការពារខ្លួនពីជំងឺមហារីក និងជំងឺផ្សេងៗនៅថ្ងៃមុខ៖

១ សាឡាដចម្រុះ៖ យោងតាមAmerican Journal of Epidemiology បានឱ្យដឹងថារបបអាហារដែលសម្បូរទៅដោយ បន្លែ ផ្លែឈើ អាចកាត់បន្ថយហានិភ័យនៃជំងឺមហារីកក្រពះ និងជំងឺសួតមួយចំនួនបាន។ របបអាហារដែលសម្បូរវីតាមីនC ក៏អាចជួយការពារជំងឺមហារីកបំពង់កបានផងដែរ។ ហេតុនេះគួរទទួលទានសាឡាដ ស្ពៃ និងផ្លែឈើចម្រុះឱ្យបានច្រើន ចម្រុះពណ៌ អាចលាយបន្ថែមជាមួយស៊ុត ត្រី និងសាច់តិចតួចដើម្បីបង្កើនរសជាតិ។

២ ទឹកក្រឡុកបៃតង៖ យោងតាមvirginiacancerspecialists បានឱ្យដឹងថាស្ពៃ kale និង​ spinach ជាបន្លែដែលសម្បូរដោយសារធាតុ Beta-caroteneនិងlutein ស្លឹកបៃតងអាចបន្ថែមអាហារូបត្ថម្ភ និងប្រឆាំងមហារីក។ អាចយកវាក្រឡុកលាយបញ្ចូលគ្នា ដោយបន្ថែមផ្លែចេក ប៉ោម ផ្លែប័រ ឬពពួកផ្លែបឺរីបន្ថែមបាន ដើម្បីឱ្យរសជាតិឆ្ញាញ់ងាយស្រួលញ៉ាំ។ ជាមួយគ្នានេះ តាមការលើកឡើងពីសាស្ត្រាចារ្យវេជ្ជបណ្ឌិត អ៊ាវ សុខា ឯកទេសជំងឺមហារីកនិងជំងឺឈាម បានលើកឡើងថា “ការញ៉ាំអាហារប្រៃដូចជាត្រីងៀត ប្រលាក់ សាច់ អាហារផ្អាប់ និងអាហារដែលប្រើជាតិអំបិលច្រើន ជាកត្តាជួយជំរុញកើតមហារីកពោះវៀនធំ។ ហេតុនេះគួរកាត់បន្ថយ ប្តូរទៅញ៉ាំប្រភេទបន្លែឱ្យបានច្រើន វាអាចជួយកាត់បន្ថយហានិភ័យនៃជំងឺមហារីកបាន។”

៣ សណ្តែក៖ ការស្រាវជ្រាវពី មន្ទីរពិសោធន៍ជីវបច្ចេកវិទ្យាប្រូតេអ៊ីនអាហារនៅសាកលវិទ្យាល័យរដ្ឋLouisiana បានបង្ហាញថាអ្នកដែលទទួលទានសណ្តែកខ្មៅឆ្អិនគឺមានហានិភ័យទាបនៃជំងឺមហារីកថ្លើម សួត សុដន់ ពោះវៀនធំ និងមហារីកក្រពេញប្រូស្តាត។ ហេតុនេះអ្នកអាចយកសណ្ដែកខ្មៅ និងពពួកសណ្ដែកផ្សេងៗទៀតស្ងោរ ជាអាហារពេលព្រឹក អាចញ៉ាំលាយជាមួយទឹកដោះគោស្រស់ ឬយ៉ាអ៊ួរ ផ្លែឈើស្រស់ៗបន្ថែមកាន់តែល្អ។ ជាមួយគ្នានេះ តាមការលើកឡើងពីអ្នកឧកញ៉ាវេជ្ជបណ្ឌិត គួច ម៉េងលី បានឱ្យដឹងថា សណ្ដែក តៅហ៊ូ យ៉ាងអ៊ួរ ទឹកដោះគោ សុទ្ធតែជាក្រុមអាហារសម្បូរវីតាមីន ស្ទើរតែអាចជំនួសឱ្យសាច់បាន ល្អសម្រាប់សុខភាព ទទួលទានអាហារទាំងនេះច្រើន មិនងាយមានជំងឺ ធ្វើឱ្យឆ្អឹងរឹងមាំថែមទៀត។

ត្រូវចាំថា អាហារដែលអ្នកញ៉ាំរាល់ថ្ងៃ ប្រៀបដូចជាបញ្ចុកថ្នាំប៉ូវ ក៏ដូចជាបញ្ចុកជំងឺដល់ខ្លួនឯងដែរ ប្រសិនបើអ្នកទទួលទានអាហារមិនបានត្រឹមត្រូវ។

គួរឱ្យដឹងផងដែរថា សាស្ត្រាចារ្យវេជ្ជបណ្ឌិត អ៊ាវ សុខា ជាវេជ្ជបណ្ឌិតឯកទេសមហារីកនិងជំងឺឈាម ហើយក៏ជាស្ថាបនិកគ្លីនិក អូរ៉េន ឃែនស័រ ដែលជាគ្លិនិកឯកទេសមហារីកទំនើបនិងឈានមុខរបស់នៅកម្ពុជាផងដែរ។ ទំនាក់ទំនងប្រឹក្សា និងណាត់ជួបវេជ្ជបណ្ឌិតតាមកាន់វេជ្ជបណ្ឌិតតាមរយៈ 090/098/099 315 959៕

អត្ថបទដោយ៖ Senghong