មាតាបិតាគ្រប់រូបត្រូវដឹងថា កុមារក៏អាចងាយកើតជំងឺធ្ងន់ៗដូចមនុស្សចាស់ដែរ ហើយជួនកាលប្រសិនបើការចិញ្ចឹមបីបាច់ពីតូចប្រហែសលើរបបអាហារ អនាម័យ ការគេងជាដើម នោះក្មេងអាចនឹងមានសុខភាពទន់ខ្សោយ ងាយកើតជំងឺនេះជំងឺនោះ ពេលពួកគេពេញវ័យបន្តិច។

ថ្ងៃនេះផងដែរយើងមកស្គាល់ពីរបបអាហារមានសារធាតុចិញ្ចឹមសប្បូរបែប សម្រាប់កុមារទទួលទានដើម្បីឱ្យប្រព័ន្ធភាពសុំាពួកគេរឹងមាំ ទប់ទល់ឈ្នះជំងឺតូចធំ និងមានប្រាជ្ញាឆ្លាតវៃ។

តាមការឱ្យដឹងពីគេហទំព័រសុខភាព Eating Well បានបង្ហាញពីអាហារ១០ដែលល្អខ្លាំងសម្រាប់កុមារ រួមមាន៖

១.យ៉ាអ៊ួ សម្បូរដោយវីតាមីនអា និងឌី ។យ៉ាអ៊ួក៏មានប្រូបាយអូទិក ដែលជាបាក់តេរីល្អសម្រាប់ក្រពះពោះវៀន ជួយដល់ការរំលាយអាហារកុមារ។តែសូមមាតាបិតាប្រយ័ត្ន កុំឱ្យកូនញុំាពពួកយ៉ាអ៊ួដែលមានលាយស្ករកែច្នៃច្រើន។

២.ពពួកគ្រាប់សណ្ដែក សម្បួរដោយសារធាតុចិញ្ចឹម សម្បូរជាតិសរសៃផងដែរ ដែលអាចជំនួយដល់ខួរក្បាល និងការចងចាំផងដែរ។ មាតាបិតា គួរទម្លាប់បញ្ចូលសណ្ដែកអាចជាស្ងោរឬចំហុយ ទៅក្នុងអាហារសម្រន់របស់កូនៗបន្ថែម។

៣.ស៊ុត សម្បូរដោយប្រូតេអ៊ីន ជាតិរ៉ែ វីតាមីនឌី និងប៊េ១២ ផងដែរ។ ស៊ុតក៏ត្រូវបានគេរកឃើញមានអូមេហ្គា៣ ដែលជំនួយដល់ការអភិវឌ្ឍរបស់ខួរក្បាលផងដែរ។ជាការប្រសើរមាតាបិតាអាចឱ្យកូនញុំាចាប់ពីអាយុ១ឆ្នាំឡើង។ អាហារមួយនេះងាយរក ហើយតម្លៃសមរម្យ ឯគុណសម្បតិ្តច្រើនលើសពីតម្លៃ ហេតុនេះវាពិតជាល្អខ្លាំងដើម្បីឱ្យកូនៗទទួលបានអាហារទិព្វមួយនេះសម្រាប់រាងកាយពួកគេ ហើយសូមកុំភ្លេចកាត់បន្ថយអាហារកញ្ចប់ កែច្នៃប្រៃផ្អែម​និងភេសជ្ជៈកំប៉ុងពីក្រពះកូនៗ។

៤.ផ្លែប៊័រ មានសារធាតុជួយប្រឆាំងអុកស៊ីតកម្មច្រើន ហើយកូលេស្តេរ៉ុលក៏ទាបដែរ។ក្រៅពីនេះក៏មានវីតាមីន និងខ្លាញ់ល្អជួយទ្រទ្រង់ដល់រាងកាយនិងប្រាជ្ញាស្មារតីផងដែរ។

៥.ដំឡូងផ្អែម ពណ៌ទឹកក្រូចនៃដំឡូងមានសារធាតុចិញ្ចឹមល្អៗ ប៉ូតាស្យូម ជាតិសរសៃ ជួយដល់ភ្នែកផងដែរ។មិនថាកុមារឡើយសូម្បីមនុស្សពេញវ័យនិងចាស់ក៏ត្រូវទទួលទានដំឡូងដើម្បីជួយដល់ភ្នែកផងដែរ។

៦.ពពួកប៊ឺរី (ស្រ្តប៊ឺរី ប្លូប៊ឺរី ប៊ឺរីខ្មៅ ) សម្បួរដោយជាតិសរសៃ និងវីតាមីនស៊ីជួយឱ្យស្បែកភ្លឺថ្លា ព្រឹងប្រព័ន្ធភាពសុំា។ ហើយថែមទាំងមានជាតិស្ករទាបថែមទៀត ដែលអាចជួយបង្ការកុមារកុំឱ្យងាយប្រឈមការលើសជាតិស្ករបាន។

៧.បន្លែគ្រប់ប្រភេទ ពណ៌បៃតងនៃបន្លែពិតជាសំខាន់ណាស់សម្រាប់ទៅចិញ្ចឹមដល់រាងកាយ ហេតុនេះសូមបង្រៀនកូនៗអ្នកឱ្យចេះញុំាពីតូច ដើម្បីពេលធំឡើងពួកគេអាចចូលចិត្តឬចេះញុំាបានគ្រប់មុខ នោះទើបរាងកាយទទួលបានសារធាតុចិញ្ចឹមគ្រប់មុខ។ ហើយបន្លែមួយចំនួនក៏បានដើរតួសំខាន់ក្នុងការប្រឆាំងនឹងជំងឺមហារីក បេះដូង ដាច់សរសៃឈាមផងដែរ។

ការទទួលបានបន្លែផ្លែឈើត្រីសាច់ស៊ុត ចម្រុះគ្នាចូលទៅក្នុងខ្លួន ជារឿងចាំបាច់ ដើម្បីឱ្យប្រព័ន្ធការពាររាងកាយរឹងមាំ អាចប្រយុទ្ធនឹងជំងឺស្លូតនិងកាចផ្សេងៗ ហេតុនេះអនាគតកូនៗទៅថ្ងៃមុខគឺពឹងជាធំលើរបបអាហារផងដែរ ហេតុនេះសូមមាតាបិតាបង្រៀន និងព្យាយាមឱ្យកូនៗទទួលយកពពួកអាហារទាំងនេះឱ្យច្រើននិងកាត់បន្ថយអាហារបង្កគ្រោះផ្សេងៗដូចជា អាហារកែច្នៃ អាហារផ្អាប់ គ្រឿងកំប៉ុង អាហារមានជាតិប្រៃនិងផ្អែមខ្ពស់ជាដើម។

អត្ថបទដោយ៖ ភោគ ម៉ារី