Autoimmune disease ជាជំងឺកើតឡើងនៅពេលដែល ប្រព័ន្ធការពារ​រាងកាយមនុស្សយើង មានដំណើរការខុសប្រក្រតី ដោយធ្វើការវាយប្រហារ ទៅលើកោសិកា និងសរីរៈផ្សេងៗ ។ ជំងឺនេះ អាចបង្កឲ្យមានជំងឺច្រើនជាង៨០ប្រភេទខុសៗគ្នា ហើយជំងឺនេះ ច្រើនកើតលើមនុស្សវ័យក្មេង អាយុពី១៥ទៅ៤៤ឆ្នាំ ។ យោងតាមគេហទំព័រ healthline.com មានជំងឺ៧ប្រភេទ ដែលត្រូវបានបង្កឡើងដោយ ជំងឺautoimmune diseaseនេះ ញឹកញាប់ជាងគេ ។

១. ជំងឺទឹកនោមផ្អែមប្រភេទទីមួយ៖ កោសិការបស់លំពែង បានរងការខូចខាត ដោយមិនអាចផលិតអ័រម៉ូនអាំងស៊ុយលីនគ្រប់គ្រាន់ ជាហេតុនាំឲ្យកម្រិតជាតស្ករឡើងខ្ពស់ ។

២. ជំងឺរលាកសន្លាក់៖ ប្រព័ន្ធការពាររាងកាយ បានវាយប្រហារលើសន្លាក់ ដែលជាហេតុនាំឲ្យ មានការឈឺចាប់ ហើម​ក្រហម និងឡើងក្ដៅ ។

៣. ជំងឺlupus៖ ជាប្រភេទ កើតឡើងក្រោយពេលដែល ប្រព័ន្ធការពាររាងកាយ បានវាយប្រហារទៅលើ សន្លាក់ តម្រងនោម(នាំឲ្យកើតជំងឺខ្សោយតម្រងនោមរ៉ាំរ៉ៃ) វាយប្រហារលើខួរក្បាល និងបេះដូងផងដែរ ។

៤. ជំងឺរលាកពោះវៀន៖ បង្កឲ្យមានការរលាក ប្រព័ន្ធរំលាយអាហារធ្ងន់ធ្ងរ ជាពិសេសពោះវៀនតែម្ដង ។

៥. ជំងឺ Addison៖ ជំងឺនេះធ្វើឲ្យប៉ះពាល់ ដល់ការផលិតអ័រម៉ូន cortisol និង aldosterone ព្រមទាំងអ័រម៉ូន androgen ផងដែរ ។ កង្វះអ័រម៉ូន cortisol អាចធ្វើឲ្យប៉ះពាល់ដល់ដំណើរការផ្ទុក និងប្រើប្រាស់ carbohydrates និងកម្រិតជាតិស្ករ ។ កង្វះអ័រម៉ូន aldosterone នឹងធ្វើឲ្យ បាត់បង់ជាតិសូដ្យូម និងលើសជាតិ ប៉ូតាស្យូម ក្នុងចរន្ដឈាម ។

៦. ជំងឺ Graves ៖ ជំងឺនេះបានវាយប្រហារ លើប្រពេញទីរ៉ូអ៊ីត ដែលបណ្ដាលឲ្យការបញ្ចេញអ័រម៉ូនច្រើនលើសកម្រិត និងបណ្ដាលឲ្យបេះដូងដើរញាប់ និងស្រកទម្ងន់ផងដែរ ។ សញ្ញាសំខាន់នៃជំងឺនេះ គឺភ្នែករបស់អ្នកជំងឺលៀនធំជាងធម្មតា ។

៧. ជំងឺ Hashimoto thyroiditis ៖ ការផលិតអ័រម៉ូន thyroid មានភាពយឺតយ៉ាវ រហូតដល់ខ្វះខាត ។ រោគសញ្ញានៃជំងឺនេះរួមមាន អ្នកជំងឺស្រកទម្ងន់ អស់កម្លាំង ជ្រុះសក់ ហើមត្រង់ក និងមានអារម្មណ៍ថា ងាយមានអារម្មណ៍ថាត្រជាក់ និងព្រឺសម្បុរ។

រោគសញ្ញានៃជំងឺ Autoimmune មានលក្ខណៈស្រដៀងគ្នា ដែលលោកអ្នកគួរកត់សម្គាល់ និងប្រុងប្រយ័ត្ន ៖ អ្នកជំងឺអស់កម្លាំងខ្លាំង រមាស់ស្បែក ហើមក្រហមស្បែក ឧស្សាហ៍ក្ដៅខ្លួនឧណ្ហៗ ស្ពឹក និងមានអារម្មណ៍ថា ចាក់ឆៀបៗត្រង់ដៃ និងជើង និងមានជ្រុះសក់ -ល-។

ក្រៅពីនេះ ជំងឺautoimmune អាចបង្កឲ្យមាន បញ្ហាសុខភាពជាច្រើនផ្សេងទៀត ករណីមានរោគសញ្ញាគួរឲ្យសង្ស័យ សូមប្រញាប់ប្រឹក្សា ជាមួយគ្រូពេទ្យជំនាញ ដើម្បីកំណត់រោគវិនិច្ឆ័យ និងព្យាបាល ឲ្យបានត្រឹមត្រូវ ៕

អត្ថបទដោយ៖ ហួ ភារ៉ា