យោងតាមការចុះផ្សាយរបស់គេហទំព័រ Healthine បានឱ្យដឹងថា ការញ៉ាំទឹកប្រទាលកន្ទុយក្រពើជាប្រចាំ សរីរាង្គរបស់មនុស្សនឹងទទួលទាននូវគុណសម្បត្តិនៃជាសារធាតុខ្លឹមៗស្ទើរគ្រប់ប្រភេទជួយដល់រូបសម្រស់ និងសុខភាព៖
១. ជាតិទឹក៖ រុក្ខជាតិប្រទាលកន្ទុយក្រពើ (Aloe Vira) សម្បូរទៅដោយសារជាតិទឹក ដែលមានតួនាទីចាំបាច់ក្នុងការចូលទៅជួយបំពេញជាតិទឹកក្នុងសរីរាង្គ ការរក្សាជាតិទឹករាងកាយ បន្សាបជាតិពុល និងលាងសម្អាតបាក់តេរីកខ្វក់ចេញពីខ្លួន។ ជាពិសេសសារធាតុចិញ្ចឹមរបស់រុក្ខជាតិមួយប្រភេទនេះជួយសម្រួលដល់តម្រងនោម និងថ្លើមបន្ថែម ដើម្បីបំពេញភារកិច្ចបន្សាបជាតិពុលក្នុងឈាម និងផលិតទឹកនោម។
២. ការរំលាយអាហារ៖ ប្រទាលកន្ទុយក្រពើផ្ទុកទៅដោយអង់ស៊ីមជាច្រើនដែលត្រូវបានគេស្គាល់ថាអាចជួយក្នុងការរំលាយជាតិស្ករនិងខ្លាញ់ និងជួយឱ្យការរំលាយអាហារដំណើរការបានល្អ។ ការសិក្សាមួយនៅឆ្នាំ ២០១៣ លើអ្នកជំងឺរលាកពោះវៀនធំ ចំនួន ៣៣ នាក់បានរកឃើញថា ទឹកប្រទាលកន្ទុយក្រពើជួយកាត់បន្ថយការឈឺចាប់ និងបញ្ហាធ្វើទុក្ខនៃជំងឺ។ កត្តានេះហើយ ក្រុមអ្នកវេជ្ជសាស្ត្របានសន្និដ្ឋានថា ទឹកប្រទាលកន្ទុយក្រពើ ជាប្រភពនៃរុក្ខជាតិថ្នាំដែលអាចជួយដល់អ្នកជំងឺរលាកពោះវៀនធំ ជួយឱ្យប្រព័ន្ធរំលាយអាហារមានដំណើរបានល្អ និងមានសមត្ថភាពស្រូបយកសារធាតុចិញ្ចឹមទាំងអស់ពីអាហារដែលកំពុងញ៉ាំឡើងវិញដោយមាប្រសិទ្ធភាព។
៣. បញ្ហាការទល់លាមក៖ ការទទួលទានទឹកប្រទាលកន្ទុយក្រពើជាប្រចាំ អាចជួយបង្កើនបរិមាណទឹកនៅក្នុងពោះវៀន។ ការស្រាវជ្រាវបានបង្ហាញពីទំនាក់ទំនងរវាងការបង្កើនសមាសធាតុទឹកនៅក្នុងពោះវៀន និងការរំញោចនៃ peristalsis ដែលជួយឱ្យលាមកត្រលប់មកមានសភាពធម្មតា។ លើសពីនេះទៅទៀត ទឹកប្រទាលកន្ទុយក្រពើក៏កម្ចាត់នូវបាក់តេរីអាក្រក់ដែលនូវតោងជាប់នឹងពោះវៀន ជួយឱ្យសុខភាពពោះវៀនល្អ និងមានតុល្យភាពផងដែរ។
៤. ស្បែកស្អាត៖ ជាតិទឹកក្នុងទឹកប្រទាលកន្ទុយក្រពើ អាចជួយកាត់បន្ថយការលេចឡើងនៃមុនលើផ្ទៃមុខ ខ្នង ឬស្បែកក្បាល និងព្យាបាលស្លាកស្នាមឱ្យប្រែប្រួលពណ៌ពី១ថ្ងៃទៅ១ថ្ងៃ។ ហើយវាក៏អាចជួយកាត់បន្ថយជំងឺស្បែកដូចជាជំងឺស្បែកឡើងជាំក្រហម និងជំងឺរលាកស្បែក។ ដោយហេតុថាប្រទាលកន្ទុយក្រពើគឺជាប្រភពសម្បូរនូវសារធាតុប្រឆាំងអុកស៊ីតកម្ម និងវីតាមីនដែលអាចជួយការពារស្បែក ដែលជាទូទៅបងប្អូនតែងឃើញគេប្រើសមាសធាតុរបស់វាធ្វើជាគ្រឿងថែរក្សាសម្រស់។ ពីព្រោះ សមាសធាតុសំខាន់ៗនៅក្នុងប្រទាលកន្ទុយក្រពើ ត្រូវបានរកឃើញថា មានផ្ទុកនូវសារធាតុចិញ្ចឹមយ៉ាងខ្លាំងក្លា បង្ការផលប៉ះពាល់នៃកាំរស្មីអ៊ុលត្រា ជួសជុលស្បែកពីការខូចខាតកាំរស្មីយូវី ការពារស្នាមជ្រួញ និងកាត់បន្ថយស្នាមជ្រួញ។