យោងតាមការឱ្យដឹងរបស់អង្គការសុខភាពពិភពលោក វ៉ាក់ស៊ាំងទាំង១៥ប្រភេទដែលកំពុងទទយលបានសិទ្ធក្នុងការប្រើប្រាស់ទូទាំងពិភពលោកគឺមានលក្ខណៈ​អាការនិងរោគសញ្ញាស្រដៀងៗគ្នាបន្ទាប់ពីចាក់រួច ដែលបងប្អូនអាចកត់សម្គាល់បានថាវាគ្រាន់តែជាការធ្វើការរបស់វ៉ាក់ស៊ាំងប៉ុណ្ណោះមិនមែនជាផលប៉ះពាល់ទេ រួមមាន ក្តៅខ្លួន ឈឺក្បាល វិលមុខ​ ឈឺខ្លួន រងារ ឈឺស្នាមរបួសនិងមានអារម្មណ៍ដូចឈឺៗជាដើម។ ប៉ុន្តែសម្រាប់អ្នកអាលែហ្ស៊ីជាមួយវ៉ាក់ស៊ាំងនិងមានរោគសញ្ញាផ្សេងទៀតដែលបងប្អូនគួរដឹងដូចខាងក្រោម។

អ្នកឧស្សាហ៍មានបញ្ហាអាលែហ្ស៊ីអាចមានបញ្ហាប្រតិកម្មជាមួយវ៉ាក់ស៊ាំងពិតប្រាកដមែន ប៉ុន្តែវាជាករណីកម្រណាស់ដែលយើងឃើញមានអ្នកអាលែហ្សីប្រតិកម្មជាមួយវ៉ាក់ស៊ាំង។ បើក្នុងករណីពួកគេមានប្រតិកម្មអាលែហ្ស៊ី​ នោះពួកគេអាចនឹងមានកន្ទួលក្រហម កន្ទួលលើស្បែក​ឬអាចមានករណីប៉ះពាល់ដល់ផ្លូបដង្ហើមផងដែរ។ ចំណែកឯប្រតិកម្មអាឡែហ្ស៊ីធ្ងន់ធ្ងរក៏អាចបណ្តាលឱ្យមានប្រតិកម្មអាណាហ្វីឡាក់ទិច​ហើ​យវានឹងមានអាការដូចជាទាក់ទងនឹងសម្ពាធឈាមទាប​ ធ្វើឱ្យក្អួតចង្អោរនិងពិបាកដកដង្ហើមក្នុងចំណោមរោគសញ្ញាផ្សេងៗទៀត។

ប្រតិកម្មអាណាហ្វីឡាក់ទិចគឺជារឿងកម្រនឹងកើតឡើងបន្ទាប់ពីប្រតិកម្មនៃការចាក់វ៉ាក់សាំង។ តែយោងតាម ​​CDC បានអោយដឹងថាមនុស្សប្រហែលពី ២-៥ នាក់ក្នុងមួយលាននាក់ឬតិចជាង ០.០០១% នៃប្រជាជនដែលបានចាក់វ៉ាក់សាំងនៅសហរដ្ឋអាមេរិកបានជួបប្រទះនឹងប្រតិកម្មអាណាហ្វីឡាក់ទិចនេះ។ ប្រតិកម្មអាលែហ្ស៊ីចំពោះវ៉ាក់សាំង mRNA ត្រូវបានគេយកចិត្តទុកដាក់ស្រាវជ្រាវជាពិសេស ដោយសារវាមានផ្ទុកនូវសារធាតុគីមីដែលគេហៅថាប៉ូលីថេលីន glycol (PEG) ដែលមិនធ្លាប់ត្រូវបានប្រើក្នុងវ៉ាក់សាំងដែលត្រូវបានអនុញ្ញាតពីមុន។ PEG គឺមាននៅក្នុងថ្នាំជាច្រើនដែលមានពេលខ្លះប្រតិកម្មអាណាហ្វីឡាក់ទិច។

យ៉ាងណាមិញយើងធ្លាប់ឃើញមានការព្រួយបារម្ភស្រដៀងគ្នានឹងករណីនេះដែរ អំពីវ៉ាក់សាំង Janssen ដែលមានផ្ទុកសារធាតុ polysorbate 80 ដែលជាសារធាតុគីមីដែលមានរចនាសម្ព័ន្ធស្រដៀងទាក់ទងទៅនឹង PEG ។ ប្រភពទិន្នន័យដែលសិក្សាអំពីប្រតិកម្មអាលែហ្ស៊ីនេះ បានកត់សម្គាល់ថាមនុស្សភាគច្រើនធ្លាប់មានប្រតិកម្មអាណាហ្វីឡាក់ទិចក្រោយពីមានប្រវត្តិនៃអាលែហ្ស៊ីនិងប្រតិកម្មធ្ងន់ធ្ងរនេះ។ CDC​ ក៏បានបញ្ជាក់ដែរថា​ទោះបីជាករណីប្រតិកម្មអាលែហ្ស៊ីនេះជាករណីកម្រ តែគ្រប់គ្នាត្រូវតាមដានសុខភាពនិងអាការៈខ្លួនឯងផង បើសង្កេតឃើញមានអាការៈដូចខាងលើដែលបញ្ជាក់ថាមានប្រតិកម្មអាលែហ្ស។ីនៅពេលចាក់ដូសទី១ គឺមិនអនុញ្ញាតឱ្យចាក់ដូសទី២ទេ៕

អត្ថបទស្រាវជ្រាវដោយ៖ កញ្ញា លីហួយ