ដូចដែលបងប្អូនដឹងហើយថាវីរុសកូវីដបំប្លែងថ្មីកំពុងតែវាយលុកទូទាំងពិភពលោក សម្លាប់មនុស្សរាប់លាននាក់។ ខណៈពេលនេះអង្គការសុខភាពពិភពលោក (WHO)ក៏បានព្រមានថា គិតត្រឹមពេលនេះវីរុសកូវីដ១៩បំប្លែងថ្មី Deltaត្រូវបានរកឃើញនៅក្នុងប្រទេសនិងដែនដីចំនួន១១១ហើយ ដោយគេសន្មតថាវានឹងក្លាយជាវីរុសដែលរាតត្បាតធ្ងន់ធ្ងរបំផុត ពាសពេញពិភពលោកតែម្តង នៅត្រឹមប៉ុន្មានខែខាងមុខទៀតប៉ុណ្ណោះ ខណៈក្នុងនោះក៏មានកម្ពុជាដែរ។

បើយោងទៅតាមរបាយការណ៍ដែលចុះផ្សាយដោយ The Time of India បានអោយដឹងថាជំងឺមួយនេះងាយឆ្លងទៅកាន់មនុស្ស៤ប្រភេទនេះរួមមាន៖

·     មនុស្សអាយុចន្លោះពី ២០-៣០ ឆ្នាំ ជាក្រុមដែលអ្នកងាយឆ្លងខ្លាំងជាងគេបំផុត

·      កូនក្មេង , ក្មេងជំទង់

·     ក្រុមមនុស្សអាយុចន្លោះពី ៣០-៣៩ ឆ្នាំ

·     បុគ្គលដែលមិនបានចាក់វ៉ាក់ស៊ាំងការពារ ឬចាក់មិនទាន់គ្រប់ដូស

ដូចនេះក្រុមមនុស្សទាំង៤នេះ ចាំបាច់ដាច់ខាតត្រូវតែការពារខ្លួនឱ្យបានខ្ជាប់ខ្ជួនខណៈវីរុសដែលតាបំប្លែងថ្មីនេះ ឆ្លងមិនមានរោគសញ្ញាឡើយលុះតែធ្លាក់ខ្លួនឈឺទើបដឹង ហើតលោកជំទាវ ឱ វណ្ណឌីន ក៏ធ្លាប់បានបញ្ជាក់ថា វីរុសនេះឆ្លងលឿនជាងមុន១៥ដង។

តែវាមិនមែនមានន័យថាអស់សង្ឃឹមក្នុងការការពារកុំឱ្យវីរុសឆ្លងចូលទៅវាយលុកសួតនោះទេ វិធីទាំង៧ខាងក្រោមនេះនឹងជួយឱ្យបងប្អូនការពារពីការឆ្លងបានយ៉ាងមានប្រសិទ្ធភាព​ទោះមិនទាន់បានចាក់វ៉ាក់ស៊ាំងឬចាក់មិនទាន់គ្រប់ដូសក៏ដោយ៖

១. ពាក់ម៉ាស បិទជិតច្រមុះ ពេលដែលអ្នកជួបជាមួយមនុស្សមកពីគ្រួសារដទៃ ជាពិសេសនៅពេលដែលអ្នកស្ថិតនៅកន្លែងមិនមានខ្យល់គ្រប់គ្រាន់ឬកន្លែងដែលមានមនុស្សច្រើន ហើយកុំភ្លេចផ្លាស់ប្តូរម៉ាសដែលអ្នកប្រើប្រាស់ឱ្យបានញឹកញាប់ផង

២. រក្សាគម្លាត ៦ ហ្វីត ( ២ម៉ែត្រ) ពីមនុស្សដែលមិនមែនជាសមាជិកគ្រួសាររបស់អ្នក

៣. លាងដៃឱ្យបានញឹកញាប់ ប្រើសាប៊ូលាងដៃ ជេល ឬអាល់កុល

៤. ចៀសវាងកុំទៅកន្លែងដែលមានមនុស្សកុះករ និងមានមិនមានខ្យល់អាកាសគ្រប់គ្រាន់

៥. មិនគួរមានការជួបជុំកម្មវិធីនៅអំឡុងពេលរាតត្បាតនេះ ក្រៅពីក្រុមគ្រួសារនោះទេ

៦. ផ្តោតការយកចិត្តទុកដាក់លើអត្រាឆ្លងកូវីដ ក្នុងសហគមន៍ រួមទាំងអត្រាឆ្លងវីរុសបំប្លែងខ្លួន Delta ផងដែរនិងចៀសវាងទំនាក់ទំនងសង្គមដែលមិនចាំបាច់ជាមួយអ្នកដទៃនៅពេលអត្រាឆ្លង កើនឡើងខ្ពស់

៧. មើលថែសុខភាពឱ្យបានល្អ ញ៉ាំស្អាត ឧស្សាហ៍ផឹកទឹកក្តៅ ហាត់ប្រាណ គេងឱ្យបានគ្រប់គ្រាន់ និងរក្សាលំនឹងផ្លូវចិត្តឱ្យនឹងនរ

ការអនុវត្តតាមវិធីទាំង៧នេះ ទោះបីជាវីរុសដែលតាខ្លាំងប៉ុណ្ណា ក៏ក្រុមការងារចាបបៃតងជឿថា បងប្អូននឹងអាចយកឈ្នះវាបាន គឺវីរុសមិនអាចចូលទៅវាយលុកសួតរបស់យើងបាននោះទេ៕