តម្រងនោម គឺជាសរីរៈមួយដ៏សំខាន់ នៃរាងកាយរបស់មនុស្សយើង ប៉ុន្តែវាក៏ងាយប្រឈម ក្នុងការកើតជំងឺជាច្រើនប្រភេទផងដែរ ។ ការគ្រប់គ្រង សម្ពាធឈាម និងកម្រិតជាតិស្ករ ក្នុងចរន្តឈាម​ មិនបានល្អ គឺជាមូលហេតុ ដ៏សំខាន់ ដែលបណ្ដាលឲ្យ កើតជំងឺខ្សោយតម្រងនោម ។ ករណីនេះ ការយល់ដឹងពី របបចំណីអាហារ ដែលអាចជួយសម្រួល ដល់ដំណើរការ និងធ្វើឲ្យតម្រងនោម មានសុខភាពល្អ គឺជារឿងដ៏ចាំបាច់ ។ យោងតាមគេហទំព័រ healthline.com មានអាហារ៧ ប្រភេទ ដែលល្អបំផុត សម្រាប់អ្នកខ្សោយតម្រងនោម ។

១. ស៊ុត៖ ស៊ុតផ្នែកពណ៌ស សម្បូរដោយជាតិប្រូតេអីន ដែលមានគុណប្រយោជន៍ ចំពោះអ្នកជំងឺខ្សោយតម្រងនោម ​ជាពិសេសអ្នកជំងឺ ដែលព្យាបាលតាមរយៈការលាងឈាម ។  

២. ខ្ទឹមស៖ សម្បូរដោយ វីតាមីន C វីតាមីន B6 និងសារធាតុប្រឆាំងការរលាក ដែលជួយការពារ សុខភាពតម្រងនោមបានផងដែរ ។

៣. ប្រេងអូលីវ៖ ជាប្រភេទខ្លាញ់ ដ៏ល្អចំពោះសុខភាព គ្មានផ្ទុកជាតិផូស្វរ ប៉ុ​ន្តែមានកាឡូរីខ្ពស់ ព្រមទាំងមានផ្ទុកសារធាតុ ប្រឆាំងការរលាក ជួយឲ្យតម្រងនោម មានសុខភាពល្អ ។

៤. ម្រេច៖ សម្បូរដោយវីតាមីន C វីតាមីនA មានប៉ូតាស្យូមទាប និងមានផ្ទុកសារធាតុ ប្រឆាំងការរលាក ដែលមានគុណប្រយោជន៍ ចំពោះសុខភាព តម្រងនោម ។

៥. ខ្ទឹមបារាំង៖ គ្មានជាតិអំបិល តែសម្បូរដោយវីតាមីនB និងវីតាមីនC ព្រមទាំងមានជាតិសរសៃផង ខ្ទឹមបារាំង​ ពិតជាអាហារដ៏ល្អ ចំពោះអ្នកដែលមានបញ្ហាតម្រងនោម ។

៦. ម្នាស់៖ ខុសពីផ្លែចេក និងផ្លែក្រូច ដែលមានផ្ទុកជាតិប៉ូតាស្យូមខ្ពស់ ផ្លែម្នាស់ មានផ្ទុកជាតិប៉ូតាស្យូមទាប ព្រមទាំងមានផ្ទុកវីតាមីន C មានជាតិសរសៃ និងមានអង់ស្ស៊ីម ឈ្មោះ bromelain ដែលមានសមត្ថភាព ជួយការបន្ថយការរលាកក្នុងបានផងដែរ ។

៧. សាច់ត្រី៖ មានជាតិប្រូតេអីន មានផ្ទុកជាតិខ្លាញ់តិច និងមានសារធាតុ សំខាន់ផ្សេងៗទៀត ដែលមានគុណប្រយោជន៍ ចំពោះសុខភាពតម្រងនោម ។

បច្ចុប្បន្ននេះ មានបងប្អូនខ្មែរយើងជាច្រើន បានកើតជំងឺខ្សោយតម្រងនោម ដូចនេះសូមលោកអ្នក យកចិត្តទុកដាក់ ពិសេសលើរបបអាហារ ការពិសារទឹកជាដើម សូមកុំភ្លេចស្រលាញ់សុខភាពទាំងអស់គ្នា៕​

អត្ថបទដោយ៖ ហួ ភារ៉ា