ជំងឺលើសឈាម ឬជំងឺលើសសម្ពាធឈាម គឺជាការកើនឡើងនៃសំពាធឈាមលើសពី កម្រិតធម្មតា (ដឹងបានតាមរយៈម៉ាស៊ីនវាស់សំពាធឈាមឱ្យបានត្រឹមត្រូវ) ឬអាការដូចជាវិលមុខ ពិបាកគ្រប់គ្រងអារម្មណ៍ ចុករោយកជាដើម ដែលវាអាចផ្តល់ផលប៉ះពាល់ទៅលើជញ្ជាំងសរសៃឈាមនៃសរីរាង្គផ្សេងៗ ជាពិសេសសរសៃឈាមបេះដូង និងសរសៃឈាមខួរក្បាល។ ជំងឺលើសឈាម ត្រូវបានទទួល ស្គាល់ថាជាឃាតករសម្ងាត់ ដែលអាចសម្លាប់មនុស្ស បានគ្រប់ពេលវេលា។
ជាការពិតណាស់ ធម្មតាអ្នកជំងឺលើសឈាម នៅពេលដែលកម្រិតឈាមកើនឡើងខ្លាំងម្តងៗគឺគាត់តែងតែយកក្រូចឆ្មារ មកលាបសព្វរាងកាយដើម្បីបញ្ចុះកម្រិតឈាមនោះឱ្យចុះវិញបានមួយគ្រាៗដែរ។ ក្រូចឆ្មារជាឱសថព្យាបាល និងកាត់បន្ថយហានិភ័យនៃការឡើងឈាមនៅផ្ទះដែលប្រជាជនភាគច្រើនបានដឹង។ ស្របជាមួយគ្នានេះដែរ បើយោងតាមការឱ្យដឹងពីគេហទំព័រ verywellhealth លោកវេជ្ជបណ្ឌិត Arno Kroner បានណែនាំថា ក្រៅពីក្រូចឆ្មារ ឱសថដែលអាចជួយកាត់បន្ថយហានិភ័យនៃការឡើងឈាមនៅផ្ទះដែលអ្នកជំងឺអាចពឹងពាក់បានខ្លះគឺជា ទឹកតែ។ តែ មានផ្ទុកទៅដោយសារធាតុ polyphenols មានតួនាទីប្រឆាំងអុកស៊ីតកម្មប្រឆាំងនិងរ៉ាឌីកាល់សេរី (ម៉ូលេគុលដែលបណ្តាលឱ្យមានអុកស៊ីតកម្មពីប្រតិកម្មគីមីនៅក្នុងខ្លួន)។ វាជួយការពារ ឬពន្យារការខូចខាតកោសិកា និងការពារប្រឆាំងនឹងការរលាក។
ពិសេសទៅទៀត យោងតាមគេហទំព័រ ndtv បានបញ្ជាក់ច្បាស់ថា មានការសិក្សាបានរកឃើញថា ផឹកតែ៥ប្រភេទនេះ១ពែងរាល់ព្រឹក គឺមានសមត្ថភាពខ្ពស់ក្នុងការគ្រប់គ្រងសម្ពាធឈាម និងកាត់បន្ថយហានិភ័យនៃការលើសឈាមបានយ៉ាងល្អ៖
១ . តែបៃតង៖ ជាតែស្ថិតក្នុងចំណាត់ថ្នាក់លេខ១ក្នុងចំណោមតែទាំង៥ដែលមានសមត្ថភាពក្នុងការគ្រប់គ្រងសម្ពាធឈាម ជួយឱ្យចរន្តឈាមរត់បានស្រួល សម្រួលសរសៃ សម្បូរទៅដោយសារធាតុប្រឆាំងអុកស៊ីតកម្ម និងល្អសម្រាប់សុខភាពបេះដូងផងដែរ។ ការផឹកតែបៃតង១ឬ២ពែងរាល់ថ្ងៃល្អបំផុតសម្រាប់អ្នកជំងឺលើសឈាម។
២. តែ Hibiscus៖ ផ្កាពណ៌ក្រហម Hibiscus គឺជាតែដែលមានប្រភពដើមមកពីប្រទេសឥណ្ឌា ត្រូវបានគេស្គាល់ថាមានលក្ខណៈសម្បត្តិអស្ចារ្យក្នុងការគ្រប់គ្រងបញ្ហាលើសឈាម។ តែ Hibiscus សំបូរទៅដោយសារធាតុប្រឆាំងអុកស៊ីតកម្មជាច្រើន ដែលល្អសម្រាប់បេះដូង។ វាគឺជាឱសថមួយក្នុងចំណោមឱសថជាច្រើនដែលត្រូវបានគេស្គាល់ថាជួយកាត់បន្ថយសម្ពាធឈាមខ្ពស់។ អ្នកគួរពិភាក្សាជាមួយវេជ្ជបណ្ឌិតជំនាញបន្ថែម សម្រាប់បរិមាណដែលអ្នកគួរញ៉ាំប្រចាំថ្ងៃ។
៣. តែអ៊ូឡុង៖ ជាតែល្បីល្បាញមួយនៅប្រទេសចិន តែនេះវាមានសារធាតុផ្សំចេញពី តែខ្មៅ និងតែបៃតង។ តែនេះសម្បូរទៅដោយសារធាតុប្រឆាំងអុកស៊ីតកម្ម ជួយទប់សម្ពាធឈាមកុំឱ្យឡើងខ្ពស់។
៤. តែ Chamomile៖ តែ Chamomile ត្រូវបានគេស្គាល់ថាសម្រាប់លក្ខណៈសម្បត្តិដ៏អស្ចារ្យរបស់វាក្នុងការគ្រប់គ្រងកម្រិតសម្ពាធឈាមខ្ពស់។ យោងតាមការសិក្សា ការទទួលទានតែនេះ និងថែមថ្នាំលើសឈាម អាចជួយបន្ថយសម្ពាធឈាមបានយ៉ាងមានប្រសិទ្ធភាព។ វាស្រដៀងគ្នាទៅនឹងតែ hibiscus តែ chamomile ជួយបន្ធូរសរសៃឈាម។ លើសពីនេះទៀត ទឹកតែនេះក៏អាចជួយសម្រួលដល់រាងកាយ និងចិត្ត ជួយឲ្យគេងលក់ស្រួល។ អ្នកគួរពិភាក្សាជាមួយវេជ្ជបណ្ឌិតជំនាញបន្ថែម មុននឹងពិសា។
៥. តែខ្មៅ៖ តែខ្មៅជាតែល្បីល្បាញនៅប្រទេសឥណ្ឌា វាមានអត្ថប្រយោជន៍ជាច្រើនសម្រាប់សុខភាព រួមទាំងការបញ្ចុះសម្ពាធឈាម។ យោងតាមការសិក្សា អ្នកដែលផឹកតែខ្មៅ៣ពែងក្នុងមួយថ្ងៃ បន្ថយសម្ពាធឈាមរបស់ពួកគេជាមធ្យមពី ២ ទៅ ៣ កម្រិត។ អ្នកគួរពិភាក្សាជាមួយវេជ្ជបណ្ឌិតជំនាញបន្ថែម សម្រាប់បរិមាណដែលអ្នកគួរញ៉ាំប្រចាំថ្ងៃ។
អត្ថបទដោយ៖ មឿន គន្ធា