រយៈពេលឈប់សម្រាល ៣ថ្ងៃតាំងពីថ្ងៃសុក្រ សៅរ៍ និងអាទិត្យនេះ តើបងប្អូនទាំងអស់គ្នាបានចេញដើរ កម្សាន្តទីណាខ្លះ? សូមបងប្អូនមេត្តាប្រុងប្រយ័ត្នឱ្យមែនទែននៅពេលធ្វើដំណើរទៅទីណានោះ។
បើយោងតាម អនុគណៈកម្មការស្រាវជ្រាវជំងឺកូវីដ-១៩ បានឱ្យដឹងយ៉ាងដូច្នេះថា នៅក្នុងរយៈពេល ៣ថ្ងៃនេះ អនុគណៈកម្មការស្រាវជ្រាវជំងឺកូវីដ-១៩បានរកឃើញ ៥ទីតាំងដែលឆ្លងកូវីដ-១៩ប្រភេទ Delta។
១ ស្ថិតនៅទីតាំងធនាគារ ឈីហ្វ (Chief Bank) សង្កាត់ស្រះចក ខណ្ឌដូនពេញ រាជធានីភ្នំពេញ។ មូលហេតុនៅថ្ងៃទី២៣ ខែកញ្ញា ឆ្នាំ២០២១ សន្តិសុខធនាគារឈីហ្វរកឃើញ វិជ្ជមានកូវីដ១៩ បំប្លែងថ្មី Delta (អ្នកជំងឺចេញរោគសញ្ញាថ្ងៃទី១៩ ខែកញ្ញា ឆ្នាំ២០២១ ហើយបានមកធ្វើការធម្មតាដល់ថ្ងៃទី២០ ខែកញ្ញា ឆ្នាំ២០២១)។
២ ស្ថិតនៅទីតាំងហាងកាហ្វេ ស្លឹកមាស នៅបុរី ឌឹ ផ្លរ៉ា ផ្ទះលេខ៣០ ផ្លូវជាតិលេខ៦ សង្កាត់បាក់ ខែង ខណ្ឌជ្រោយចង្វារ រាជធានីភ្នំពេញ។ មូលហេតុមានអ្នកវិជ្ជមានកូវីដ-១៩ថ្ងៃទី២១ កញ្ញា ឆ្នាំ២០២១ ដែលអ្នកជំងឺជាបុគ្គលិកនៅក្នុងហាងកាហ្វេ។
៣ ស្ថិតនៅទីតាំងធនាគារកម្ពុជាពាណិជ្ជផ្លូវលេខ១១៤ សង្កាត់ផ្សារថ្មី២ ខណ្ឌដូនពេញ រាជធានី ភ្នំពេញ។ មូលហេតុមានអ្នកជំងឺជាបុគ្គលិកធនាគារកម្ពុជាពាណិជ្ជវិជ្ជមានកូវីដ-១៩បំប្លែងថ្មី Delta ថ្ងៃទី១៩ កញ្ញា ឆ្នាំ២០២១។
៤ អ្នកជំងឺកូវីដ-១៩ បំប្លែងថ្មី Delta ចំនួន ០១នាក់ បានធ្វើដំណើរ នៅថ្ងៃទី ១៨ ខែកញ្ញា ឆ្នាំ២០២១ តាមរថយន្ត VIP ក្រុមហ៊ុន ឡារីតា ចេញពីខេត្តសៀមរាប វេលាម៉ោង១៤:០០ មកដល់ រាជ ធានីភ្នំពេញ ម៉ោង២០:៣០ ឈប់នៅបេនឡាន ឡារីតា សាខាសង្កាត់ស្រះចក ខណ្ឌដូនពេញ រាជធានីភ្នំពេញ។
៥ ស្ថិតនៅទីតាំងក្រុមហ៊ុន Century 21 Mekong ផ្លូវលេខ274 សង្កាត់បឹងកេងកង១ ខណ្ឌបឹង កេងកង រាជធានីភ្នំពេញ។ មូលហេតុអ្នកជំងឺជាបុគ្គលិកក្រុមហ៊ុនខាងលើបានចេញរោគសញ្ញាថ្ងៃទី ១៩ កញ្ញា ២០២១ បានរកឃើញវិជ្ជមានកូវីដ-១៩ បំប្លែងថ្មី Delta ថ្ងៃទី២៣ កញ្ញា ឆ្នាំ២០២១។
សូមបងប្អូនដែលបានចូលទីតាំងទាំង ៥ខាងលើក្នុងអំឡុងពេលនេះ សូមយកចិត្តទុកដាក់ តាមដានសុខភាពរបស់ខ្លួន រយៈពេល ២១ថ្ងៃ។ ដូច្នេះនៅក្នុងករណីចេញរោគសញ្ញាសង្ស័យកូវីដ-១៩ សូមអញ្ជើញទៅធ្វើតេស្តសំណាកនៅតាមទីតាំងដែលជិតបំផុត។