លោកលី ក្វានយូ ជារដ្ឋមន្ត្រី​សិង្ហ​បុរី។ គាត់បានជួបស្នេហាជាមួយលោកស្រី Kwa Geok Choo នៅមហហាវិទ្យាល័យRaffles។ តាមពិតគូស្នេហាមួយនេះ ជាដៃគូប្រជែងនឹងគ្នាក្នុងវ័យសិក្សា។ ដោយលោកស្រី Choo ជាសិស្សពូកែផ្នែកវិទ្យាសាស្រ្តសេដ្ឋកិច្ច និងភាសាអង់គ្លេស កាន់តែប្រជែងគ្នា ធ្វើឱ្យមានអារម្មណ៍ស្នេហាចាប់ផ្តើមឆេះឡើងក្នុងបេះដូងអ្នកទាំងពីរ។ រហូតក្លាយជាគូស្នេហ៍នឹងគ្នា។

ហើយលោក លីបាននិយាយថា “កាលខ្ញុំនៅយុវជនមានការអប់រំនៅមហាវិទ្យា និងគ្មានការងារធ្វើច្បាស់។ ឪពុកម្តាយខាងស្រី មិនចាប់អារម្មណ៍នឹងខ្ញុំ ធ្វើជាកូនប្រសាទេ។ ប៉ុន្តែភរិយាខ្ញុំ មានជំនឿលើខ្ញុំជានិច្ច។” គាត់បានលួចរៀបការនៅឆ្នាំ ១៩៤៧ នៅប្រទេសអង់គ្លេស។ ហើយគាត់រៀបការម្តងលើកទី២ ដើម្បីផ្គាប់ចិត្តឪពុកម្តាយ និងមិត្តភក្តិ។ នេះជាស្នេហាពួកគាត់ ព្យាយាមយល់ចិត្តគ្នាស៊ីជម្រៅ និងក្លាយជាមិត្តរួមប្រលឹងតែមួយ។

ស្នេហាយល់គ្នាស៊ីជម្រៅ គួរធ្វើបែបណា? គឺស្តាប់គ្នា ព្យាយាមយល់ពីគ្នាដូចជាលោក​លី គោរពភរិយាគាត់ខ្លាំងណាស់។ មកពីភរិយាគាត់ជាមនុស្សស្មោះត្រង់ និងជាទីប្រឹក្សារបស់គាត់រហូតមក។ នៅឆ្នាំ ២០០៣ ភរិយាគាត់ទទួលរងជំងឺដាច់សរសៃឈាមខួរក្បាល។ លោកលី ក៏នៅតែមើលថែភរិយាគាត់ដែរ។

នៅក្នុងសៀវភៅកំណត់ហេតុមួយបានសរសេរពីលោកលី ក្វាន់យូ ថា គាត់បានរុញរទេះជូនភរិយាដើរលេង នៅក្នុងសារមន្ទីរមួយកន្លែង។ លោកលី បានសួរដោយសម្តីថ្នមៗថា អារម្មណ៍អូនយ៉ាងមិចហើយ? ហើយអូនមានគំនិតបែបណា ចំពោះផ្ទាំងគំនូរទាំងនេះ។ គូស្នេហ៍នេះ បានចែករំលែកក្តីស្រឡាញ់តាមរយៈការនិយាយគ្នាក្នុងភាពស្ងប់ស្ងាត់។ ហើយពេលខ្លះ សើចជាមួយគ្នា។ វាជាអារម្មណ៍ហាក់ដូចជាកន្លែងហ្នឹង មានតែពួកគាត់ពីរនាក់ប៉ុណ្ណោះ។ ហើយគូស្នេហ៍ស្រឡាញ់ដល់វ័យចាស់ បានរួមដំណើរជាមួយគ្នាអស់រយៈ ៦៣ឆ្នាំមកហើយ។

នៅឆ្នាំ២០០៨ ភរិយាគាត់ មានជំងឺកាន់តែធ្ងន់ មិនអាចនិយាយបាន។ ហើយជារៀងរាល់ថ្ងៃ បន្ទាប់ពីត្រឡប់មកពីធ្វើការងារវិញ។ លោកលី បានចំណាយពេល២ម៉ោង នៅជាមួយភរិយាគាត់ ហើយនិយាយរំលឹករឿងចាស់ៗ និងអានកំណាព្យឱ្យភរិយាស្តាប់ជានិច្ច។

នៅឆ្នាំ ២០១០ លោកស្រី Kwa Geok Choo បានស្លាប់ធ្វើឱ្យប្រជាជនសិង្ហបុរី មានការរំជួលចិត្តក្នុងភាពក្រៀមក្រំពិធីបុណ្យសព។ លោកលី បានដើរទៅកាន់មឈូស ហើយបានដាក់ផ្កាក្រហមលើដងខ្លួនឧត្តមភរិយារបស់គាត់។ បន្ទាប់មក គាត់បានអោនលូកចាប់ដៃភរិយាជាទីស្រឡាញ់ រួចថើបដៃពីរដង ក៏បានដាក់ដៃចុះ ហើយគាត់បានរំជួលអារម្មណ៍សម្រក់ទឹកភ្នែកបន្តិច។

នៅក្នុងពិធីបុណ្យនោះ លោកលីបានថ្លែងសុន្ទរកថាចុងក្រោយចំពោះសេចក្តីស្រឡាញ់ក្នុងជីវិតរបស់គាត់ថា ខ្ញុំមានអនុស្សាវរីយ៍ដ៏មានតម្លៃជាមួយភរិយាខ្ញុំ អស់រយៈពេល ៦៣ឆ្នាំនៅជាមួយគ្នា។ បើគ្មានភរិយាខ្ញុំទេ ខ្ញុំច្បាស់ជាក្លាយជាមនុស្សប្រុសផ្សេង និងមានជីវិតខុសគ្នា ពេលបច្ចុប្បន្ននេះ។ ភរិយាខ្ញុំបានលះបង់ជីវិតនេះ ដើម្បីខ្ញុំ និងកូនៗរបស់ពួកយើង។ វាជាថ្ងៃ ធ្វើឱ្យខ្ញុំមានទុក្ខព្រួយខ្លាំងមែនទែន។

ទោះបីភរិយាគាត់បានស្លាប់ក៏ដោយ លោកលី បានដាក់រូបថត ស្តាប់តន្រ្តីបុរាណដែលភរិយាគាត់បានស្តាប់ ហើយវាធ្វើឱ្យគាត់ស្រក់ទឹកភ្នែក គ្រប់ពេលដែលប៉ះមនោសញ្ចេតនារបស់គាត់។ ហើយលោកលី បានស្លាប់នៅឆ្នាំ ២០១៥ ធ្វើឱ្យប្រជាជនសិង្ហបុរីមានអារម្មណ៍សោកស្តាយបំផុត៕ អត្ថបទដោយ៖ ទ្រ សុភាព