អ្នកម្ដាយណាកំពុងពពោះ ឬក៏សម្រាលបុត្ររួច ឈប់ដេកកើតទុក្ខ “រឿងសម្រស់” ទៀតទៅ! អ្នកម្ដាយគ្រាន់តែចំណាយពេលអង្គុយអានអត្ថបទមួយនេះត្រឹម ៣នាទី ហើយអត្ថបទមួយនេះនឹងលុបបំបាត់ទុក្ខព្រួយរបស់អ្នកម្ដាយទាំងអស់បាន។
ជាការពិតណាស់ នៅពេលសម្រាលកូនរួច ស្ដ្រីភាគច្រើនតែងតែធ្លាក់សម្រស់ ឬមានបញ្ហាស្បែកឡើងសង្វារជាដើម។ មិនតែងប៉ុណ្ណោះទេ ស្ដ្រីភាគរយច្រើនតែងតែចំណាយលុយរាប់ម៉ឺន ដើម្បីទិញផលិតផលថែរក្សាសម្រស់ ប៉ុន្តែបែរជាមិនសូវមានប្រសិទ្ធភាពទៅវិញ។ អញ្ចឹងថ្ងៃនេះ រូបខ្ញុំនឹងនាំអ្នកម្ដាយគ្រប់រូបមមកអនុវត្តរូបមន្តសាមញ្ញមួយនេះ ដើម្បីជួយអ្នកទាំងអស់គ្នាគេចផុតពីពិភពអាក្រក់មួយនេះ ដែលក្នុងនោះរួមមាន៖
១.កំលុងពេលពពោះ៖
‑អ្នកម្ដាយដែលកំពុងពពោះគ្រប់រូបត្រូវការពារខ្លួន ដោយចៀសពីពន្លឺព្រះអាទិត្យ ឬកម្ដៅថ្ងៃនាពេលថ្ងៃត្រង់ ពីព្រោះថាពន្លឺព្រះអាទិត្យអាចបង្កឱ្យស្បែករបស់អ្នកឡើងជាំខ្លាំង។ ដូច្នេះប្រសិនបើអ្នកចេញក្រៅត្រូវប្រើឡេការពារកម្ដៅថ្ងៃ ឬស្លៀកសម្លៀកបំពាក់ឱ្យបានជិតៗជាដើម។
‑អ្នកម្ដាយគ្រប់រូបត្រូវញុំាទឹក ៨កែវក្នុងមួយថ្ងៃ ដើម្បីបង្កើនសំណើមលើស្បែក និងរក្សាអរម៉ូនឱ្យបានល្អប្រសើរ។
‑អ្នកម្ដាយគ្រប់រូបត្រូវលាងសម្អាតផ្ទៃមុនពី ២ ទៅ ៣ដងក្នុងមួយថ្ងៃ ដើម្បីកម្ចាត់ខ្លាញ់លើមុនរបស់អ្នក ហើយការទម្លាប់ធ្វើបែបនេះនឹងជួយឱ្យស្បែកមុខរបស់អ្នកមានសំណើម ស្រស់ស្អាត និងមានអនាម័យ។
‑អ្នកម្ដាយគ្រប់រូបត្រូវគេងឱ្យបានគ្រប់គ្រង ឬគេងឱ្យបាន ៨ម៉ោងក្នុងមួយថ្ងៃ ដើម្បីរក្សាស្បែករបស់អ្នកឱ្យមានតល្យភាព ពីព្រោះថាប្រសិនបើអ្នកគេងមិនបានគ្រប់គ្រាន់នោះទេ នោះវានឹងធ្វើឱ្យស្បែករបស់ឆាប់ចាស់។
‑អ្នកម្ដាយគ្រប់រូបត្រូវតែញុំាបន្លែបៃតង ឬបន្លែសម្បូរជាតិដែកឱ្យបានគ្រប់គ្រាន់ ដើម្បីបង្កើនស្រស់ស្បែក និងល្អចំពោះសុខភាបរបស់កូន។
‑អ្នកម្ដាយគ្រប់រូបត្រូវលាបប្រេងសម្បូរជាតិវីតាមីនអ៊ី ឬប៊ឺផ្លែកាកាវ ដើម្បីបំបាត់ស្នាមសង្វារលើស្បែករបស់អ្នក។
‑អ្នកម្ដាយគ្រប់រូបត្រូវញុំាអាហារឱ្យបានទៀងទាត់ទាន់ពេលវេលា ដើម្បីការពារស្បែករបស់អ្នកក្រោយពេលសម្រាល។
២.ក្រោយពេលសម្រាលកូន៖
‑ប្រើប្រាស់វីតាមីនអេ៖ ជាការពិតណាស់ វីតាមីន A មានអត្ថប្រយោជន៍ជួយធ្វើអោយស្បែកម៉ត់រលោង ជាពិសេសជួយបំបាត់ស្នាមសង្វារនៅលើខ្លួនប្រាណរបស់ស្ដ្រីពពោះបានយ៉ាងមានប្រសិទ្ធិភាព។ នៅក្នុងនោះដែរ វីតាមីនអេសម្បូរនៅក្នុង ផ្លែការ៉ុត ម្ទេសក្រហម ត្រសក់ស្រូវ ផ្លែស្វាយ សណ្ដែកបារាំង ។ល។
‑ប្រើប្រាស់ប្រេងដូង៖ ការប្រើប្រាស់ប្រេដូង មិនអាចជួយបំបាត់សង្វារនោះទេ ប៉ុន្តែប្រេងដូងមានមុខងារជួយព្យាបាលស្បែករបស់អ្នកអោយភ្លឺរលោង និងកាត់បន្ថយស្នាមលើស្បែករបស់អ្នក។ ដូច្នេះអ្នកគួរប្រើប្រេងដូងដើម្បីព្យាបាលស្បែករបស់អ្នក និងការពារការកើនឡើងនៃស្នាមសង្វារ។
‑ញុំារបបអាហារសុខភាព និងធ្វើលំហាត់ប្រាណ៖ ពិតមែនហើយ ការញុំាអាហារសុខភាព និងធ្វើលំហាត់ប្រាណ គឺជាគន្លឹះក្នុងការព្យាបាលបន្ដឹងស្បែករបស់អ្នក ដើម្បីលុបបំបាត់ស្នាមសង្វារលើដងខ្លួនរបស់អ្នក ហើយសម្រាប់លំហាត់ប្រាណអ្នកអាច ដើរ រត់យឺត ឬហាត់យូហ្គាជាដើម។
‑ញុំាទឹកឱ្យបានច្រើន៖ ទឹក គឺជាប្រភពចម្បងសម្រាប់មនុស្សគ្រប់គ្នា ជាពិសេសម្រាប់ស្ដ្រីៗដែលចង់ព្យាបាលស្នាមសង្វារតែម្តង ពីព្រោះថាការញុំាទឹកជួយបង្ហើនសំណើមលើស្បែក និងជួយថែរក្សាឱ្យស្បែករបស់អ្នកភ្លឺថ្លាផងដែរ។ ដូច្នេះជាទូទៅ ស្ដ្រីគួរញុំាទឹកប្រមាណជា ២.៣លីត្រឡើងលើ។
អត្ថបទដោយ៖ Daddy_Rath