មនុស្សយើងម្នាក់ៗ សុទ្ធតែមានភាពពូកែរៀងៗ ខ្លួន មានអ្នកខ្លះពូកែផ្នែករាំ អ្នកនិពន្ធ អ្នករកស៊ី និងបច្ចេកវិទ្យាជាដើម។ តាមអ្នកចិត្តសាស្រ្តលោក Scott Barry Kaufman បានផ្តល់បទសម្ភាស៍ឱ្យ Big Think ពីវិធីបណ្តុះគំនិតច្នៃប្រឌិតឱ្យខ្លាំងពូកែ ព្រោះមនុស្សយើងធ្វើអ្វីក៏ដោយនៅសម័យទំនើនេះ ត្រូវតែមានគំនិតច្នៃប្រឌិតបែបថ្មីៗ ដើម្បីភាពជោគជ័យលើជីវិត និងការងារប្រសើរផងដែរ។

ខាងក្រោមនេះជាគន្លឹះនាំអ្នកឱ្យមានភាពច្នៃប្រឌិតកាន់តែខ្ពស់៖

១. រៀនសូត្រជានិច្ច៖ តាមលោក Scott Barry Kaufman បានបញ្ជាក់ថា "ការច្នៃប្រឌិតទាមទារសមត្ថភាពរបស់យើង ដើម្បីដឹងពីអ្វីដែលយើងបានរៀនសូត្រពីបុព្វបុរសជំនាន់មុន។ ហើយវាក៏កើតឡើងនៅពេលយើងមានចក្ខុវិស័យដ៏អស្ចារ្យ ជាក្តីស្រមៃ បម្រើដល់ពិភពលោកនេះ អាចទៅរួចដែរ។ ខ្ញុំគិតថា ពេលរៀនសូត្រ និងមានចក្ខុវិស័យបញ្ចូលគ្នា ធ្វើឱ្យគំនិតយើងមានការ​ច្នៃ​ប្រឌិត​ច្រើន"។ នេះជាការបញ្ជាក់ថា ការមានចំណេះដឹង គឺជាមូលដ្ឋានគ្រឹះនៃការច្នៃប្រឌិតទាំងឡាយ។ ពេលយើងមានចំណេះដឹងធ្វើម្ហូបមួយ ពីដូនតាយើង យើងគួរតែច្នៃវាបន្ថែមទៀតដោយការប្រឹងប្រែងរបស់អ្នកផងដែរ។

២. បើកចិត្តយកបទពិសោធន៍ថ្មីៗ៖ បន្ទាប់ពីអ្នកមានចំណេះដឹងហើយ អ្នកត្រូវមានបទពិសោធន៍ថ្មីៗ បន្ថែមទៀត ដើម្បីមានការច្នៃប្រឌិតកាន់តែសម័យទំនើប។ ដូចជាការរៀនជំនាញវិជ្ជាជីវៈ បទពិសោធន៍ថ្មីៗផ្តល់នូវចំណេះដឹង និងការយល់ដឹងជាច្រើនសម្រាប់ការស្រមើស្រមៃរបស់អ្នក ដើម្បីទាញយកភាពច្នៃប្រឌិតបែបថ្មី និងប្លែកៗ ផងដែរ។ លោក Kaufman បាននិយាយថា "នៅពេលដែលយើងពិតជាបើកចំហបេះដូង ចំពោះអ្វីដែលយើងកំពុងជួបប្រទះ វាធ្វើឱ្យយើងរីកចម្រើន ហើយខ្ញុំគិតថា នេះជាពេលដែលការច្នៃប្រឌិតដ៏ប្រសើរបំផុត ដែលអាចកើតមាន។

៣. ទទួលយកភាពស្ងៀមស្ងាត់៖ លោក Steve Jobs អាចមានគំនិតច្នៃប្រឌិតបង្កើតទូរស័ព្ទ Iphone និងធ្វើឱ្យពិភពលោកទទួលស្គាល់ស្នាដៃរបស់គាត់ជាច្រើន មកពីគាត់តែងតែនៅម្នាក់ឯង ហើយពេលខ្លះគាត់អង្គុយគិតជិត៤ម៉ោងឯណោះ។ ធ្វើឱ្យគំនិតគាត់មុតស្រួច និងផលិតគំនិតថ្មីៗ ធ្វើឱ្យក្រុមហ៊ុនApple មានតម្លៃលើពិភពលោកនេះ។

៤. ការច្នៃប្រឌិតកើតពីការស៊ូ៖ មាន​ទម្លាប់​មួយ​ទៀត ​ដែល​អាច​ជួយ​នាំ​មក​នូវ​ភាព​វៃឆ្លាត និង​ការ​ស្រមើស្រមៃ​រួម​គ្នា មានភាពច្នៃប្រឌិតខ្ពស់នោះ គឺ ការ​តាំង​ចិត្ត ការផ្តោតអារម្មណ៍ និង​ការ​ខិតខំស៊ូមិនចុះចាញ់នេះឯង។ ហើយ​ទម្លាប់​នេះ​ជា​ហេតុផល​មួយ​ដែល​មនុស្ស​ជា​ច្រើន​សន្មត់​ថា ​ការ​ច្នៃ​ប្រឌិតដល់កម្រិតកំពូក ព្រោះមូលហេតុទាំងបីនេះឯង។ លោក Scott Barry Kaufman បានបញ្ជាក់ថា គោលដៅច្នៃប្រឌិត អាចសម្រេចបានកើតពីការស៊ូលើការងារឱ្យខ្លាំង ដើម្បីឈានឱ្យស៊ីជម្រៅក្នុងការងារមួយនេះ រហូតអ្នកមានអារម្មណ៍រំភើបនឹងវាផងដែរ៕

អត្ថបទដោយ៖ ទ្រ សុភាព