នៅក្នុងប្រទេសកម្ពុជា ពីមួយឆ្នាំទៅមួយឆ្នាំ ជំងឺគ្រុនឈាមមានកើនឡើងខ្ពស់ ក្នុងចំណោមប្រជាជន២ម៉ឺននាក់ មាន១០០ករណីជាង ឬច្រើនជាងនេះដែលកើតគ្រុនឈាម ដែលនេះជាការព្រួយបារម្ភ និងគួរយកចិត្តទុកដាក់ផងដែរ នេះបើផ្អែកតាមកការឱ្យដឹងពីអ្នកឧកញ៉ា វេជ្ជបណ្ឌិត គួច ម៉េងលី។ ដូចដែលបងប្អូនបានដឹងហើយ ថាជំងឺនេះកើតឡើងដោយសារមូសខាំ គួរប្រុងប្រយ័ត្នខ្ពស់ ហើយជំងឺនេះអាចដឹងបាន តាមរយៈការធ្វើតេស្តឈាមប៉ុណ្ណោះ។

ដោយសារជំងឺនេះ មានរោគសញ្ញាស្រដៀងគ្នានិងគ្រុនផ្ដាសាយធម្មតា ធ្វើឱ្យអ្នកជំងឺយល់ច្រឡំ មិនបានចាប់អារម្មណ៍ ចេះតែផ្សំថ្នាំលេបផ្ដេសផ្ដាស។ ទាំងនេះសុទ្ធតែជាហានិភ័យគ្រោះថ្នាក់ ព្រោះជំងឺគ្រុនឈាម ងាយនឹងវិវត្តទៅធ្ងន់ធ្ងរក្នុងរយៈពេលខ្លី ងាយបែកគ្រាប់ឈាម ធ្វើឱ្យសម្ពាធឈាមធ្លាក់ចុះភ្លាមៗ ឆក់យកជីវិតមនុស្សយ៉ាងឆាប់រហ័ស នេះបើផ្អែកតាមការឱ្យដឹងពី mayoclinic.org។

ដើម្បីបង្ការហានិភ័យគ្រោះថ្នាក់ដល់ជីវិតនេះ លោកអ្នកគួរយកចិត្តទុកដាក់និងស្គាល់ឱ្យច្បាស់ពីរោគសញ្ញាគ្រុនឈាម ដើម្បីកុំឱ្យច្រឡំថាខ្លួនឯងគ្រុនធម្មតាដែលអាចបង្កគ្រោះថ្នាក់បានគ្រប់ពេល។ រោគសញ្ញានៃគ្រុនឈាមមានដូចជា៖

- គ្រុនក្ដៅខ្លាំងចន្លោះពី៤ទៅ១០ថ្ងៃមិនបាត់ (បើគ្រុនក្ដៅលើសពី៣ឬ៤ថ្ងៃឡើង ហើយគ្មានហៀរសំបោរ គួរឆាប់ទៅពេទ្យ)

- ក្ដៅខ្លួនខ្លាំង កម្ដៅជិតឬ៤០អង្សារសេ

- ឈឺក្បាល

- ឈឺតាមសាច់ដុំ និងសន្លាក់

- មានក្អួត ចង្អោរ

- ឈឺខាងក្រោយភ្នែក

- ហើមក្រឡទែន

- មានកន្ទួល ក្រហមលើស្បែកឬរមាស់។

ជាមួយគ្នានេះ ផ្អែកតាមអ្នកឧកញ៉ាវេជ្ជបណ្ឌិត គួច ម៉េងលី បានឱ្យដឹងថា បើទុកឱ្យជំងឺនេះចូលដល់សភាពធ្ងន់ធ្ងរ គ្រុនចន្លោះពី៣ទៅ៧ថ្ងៃឡើងទៅ អ្នកជំងឺអាចមានអាការចុកពោះខ្លាំង ក្អួតខ្លាំង ឈាមតាមអញ្ចាញធ្មេញ ក្អួតឈាម អស់កម្លាំងរសេះរសោះ ពិបាកដកដង្ហើមជាដើម។ ហេតុនេះ ជំងឺនេះជាបញ្ហាព្រួយបារម្ភ ព្រោះវាមានគ្រោះថ្នាក់ខ្លាំង។ វេជ្ជបណ្ឌិត បានបន្ថែមទៀតថាជំងឺនេះមិនទាន់មានថ្នាំព្យាបាលនៅឡើយទេ ទាមទារឱ្យអ្នកជំងឺត្រូវទទួលការព្យាបាលពីគ្រូពេទ្យ ផឹកទឹកឱ្យបានច្រើន មានករណីសង្ស័យចៀសវាងការលេបថ្នាំអាស្ពេរីន ថ្នាំនេះអាចប៉ះទង្គិចធ្វើឱ្យឈាមកាន់តែរាវ អាចហូរឈាមខ្លាំងលើសដើម។

ជារួមមកវិញ ជំងឺនេះអាចកើតលើមនុស្សគ្រប់វ័យ មិនថាកុមារ ឬមនុស្សពេញវ័យនោះទេ។ ករណីមានរោគសញ្ញាសង្ស័យ លើសពី៣ថ្ងៃឡើងទៅ លេបថ្នាំមិនបាត់ គួរតែឆាប់ទៅជួបគ្រូពេទ្យ និងធ្វើតេស្តឈាមឱ្យបានច្បាស់លាស់ ចៀសវាងកើតជំងឺគ្រុនឈាម មានគ្រោះថ្នាក់ដល់ជីវិត៕

អត្ថបទដោយ៖ Senghong