Prediabetes គឺកើតឡើងនៅពេលដែលកម្រិតជាតិស្ករកើនលើសធម្មតា ប៉ុន្តែមិនទាន់អាចកំណត់ថា លោកអ្នកកើតជំងឺទឹកនោមផ្អែមនៅឡើយទេ ។ កម្រិតជាតិស្ករខ្ពស់បែបនេះ អាចបន្តក្នុងរយៈពេលរាប់ឆ្នាំ មុនត្រូវបានកំណត់រោគវិនិច្ឆ័យថា លោកអ្នកកើតជំងឺទឹកនោមផ្អែម ។ ក្នុងដំណាក់កាលនេះ អ្វីៗនៅមិនទាន់ហួសពេលនៅឡើយទេ លោកអ្នកអាចគ្រប់គ្រងកម្រិតជាតិស្ករបាន ដោយផ្លាស់ប្ដូរទម្លាប់ក្នុងការរស់នៅ ធ្វើលំហាត់ប្រាណ ការគ្រប់គ្រងអារម្មណ៍ ជាពិសេសមានរបបអាហារត្រឹមត្រូវ ដែលជួយរក្សាតុល្យភាពជាតិស្ករ ក្នុងចរន្តឈាមបានល្អ ហើយជួយការពារ ឬ ជួយពន្យារក្នុងការកើតជំងឺទឹកនោមផ្អែមបានរហូតដល់ទៅ១០ឆ្នាំ ។ ខាងក្រោមជាទម្លាប់ ដែលជួយលោកអ្នកគ្រប់គ្រងជាតិស្ករបានល្អ។
១. ទម្លាប់ញ៉ាំឲ្យបានទៀងទាត់៖ ទម្លាប់ញ៉ាំអាហារមិនទៀងទាត់ បានជម្រុញឲ្យកម្រិតជាតិស្ករក្នុងចរន្តឈាមឡើងខ្ពស់ជាងធម្មតា ។ ទម្លាប់ញ៉ាំអាហារចន្លោះពេលពី ៤ទៅ៥ម៉ោង អាចជួយរក្សាតុល្យភាពជាតិស្ករបានល្អ ។
២. កុំទម្លាប់ញ៉ាំអាហារសម្រន់ញឹកញាប់៖ ទម្លាប់ញ៉ាំអាហារសម្រន់ដូចជា ដំឡូងបារាំងក្រៀម និងអាហារម្សៅផ្សេងទៀត អាចនាំឲ្យកម្រិតជាតិស្ករឡើងខ្ពស់ ហើយងាយបណ្ដាលឲ្យលោកអ្នកកើតជំងឺទឹកនោមផ្អែមបាន។
៣. កុំទម្លាប់ក្រោយញ៉ាំអាហារហើយសម្រាកភ្លាម៖ លោកអ្នកដែលមានទម្លាប់គេង ឬអង្គុយមើលទូរទស្សន៍ ដោយគ្មានសកម្មភាពអ្វីសោះ ក្រោយញ៉ាំអាហាររួច វាបានធ្វើឲ្យកម្រិតជាតិស្ករក្នុងចរន្តឈាមឡើងខ្ពស់។ លោកអ្នកគួរទម្លាប់ដើរ ឬធ្វើសកម្មភាពខ្លះៗ ឲ្យបានរយៈពេល១០នាទី ក្រោយញ៉ាំអាហាររួច ដើម្បីឲ្យកម្រិតជាតិស្ករចុះទាបសិន ។
៤. កាត់បន្ថយការញ៉ាំផ្អែម៖ ទម្លាប់ញ៉ាំផ្អែមខ្លាំង ជាពិសេសការញ៉ាំភេសជ្ជៈកំប៉ុង និងនំដែលផ្អែមខ្លាំង គឺពិតជាមិនល្អទេចំពោះអ្នកដែលមានកម្រិតជាតិស្ករខ្ពស់ស្រាប់ទៅហើយ៕
អត្ថបទដោយ៖ ហួ ភារ៉ា
ប្រភព៖ www.eatthis.com