គិតមកទល់នាពេលបច្ចុប្បន្ន មនុស្សពេញវ័យ ១នាក់ក្នុងចំណោម ២ នាក់នៅសហរដ្ឋអាមេរិក បានជួបប្រទះនូវការកើនឡើងកម្រិតជាតិស្ករខ្ពស់ក្នុងឈាម ដោយស្ថានភាពនេះ ត្រូវបានផ្សារភ្ជាប់ទៅនឹងបញ្ហានៃការធាត់ ជំងឺលើសឈាម ជំងឺទឹកនោមផ្អែម ជំងឺបេះដូង និងដាច់សរសៃឈាមខួរក្បាល នេះបើយោងតាមការស្រាវជ្រាវដែលធ្វើឡើងដោយ American College of Cardiology និង American Heart Association។
យោងទៅតាមប្រភពចេញផ្សាយរបស់គេហទំព័រ eatthis បានបង្ហាញឱ្យដឹងថា ចំពោះបញ្ហាកើតឡើងកម្រិតជាតិស្ករក្នុងឈាមនេះ ពាក់ព័ន្ធទៅនឹងការទទួលទាននូវកម្រិតកាបូអ៊ីដ្រាតប្រចាំថ្ងៃ ជាពិសេសប្រភេទកាបូអ៊ីដ្រាតកែច្នៃ ដោយចំពោះក្រុមអាហារមួយចំនួននោះ មនុស្សទម្លាប់ទទួលទានប្រចាំថ្ងៃ ហាក់ដូចជាគ្មានជាតិផ្អែមអ្វី តែវាអាចធ្វើឱ្យជាតិស្ករកើនឡើងឥតឈប់៖
១. នំបុ័ងពណ៌ស៖ នំបុ័ងពណ៌ស គឺជាអាហារចម្បងមួយនាក្នុងប៉ែកអឺរ៉ុប និងជះឥទ្ធិពលមួយភាគធំដល់ក្នុងប៉ែកអាស៊ីផងដែរ។ សារជាតិនៅក្នុងនំប៉័ងស ត្រូវបានគេរកឃើញនូវសន្ទស្សន៍ glycemic ខ្ពស់ (GI) ដែលជារង្វាស់នៃអាហារដែលបង្កើនជាតិស្ករក្នុងឈាមភ្លាមៗ នៅពេលដែលកាបូអ៊ីដ្រាតនេះត្រូវបានរំលាយ។
២. បាយស៖ ប្រភេទបាយស នូវកម្រិតកាឡូរី និងជាតិកាបូអ៊ីដ្រាតខ្ពស់ ក្នុងករណីប្រសិនបើទទួលទានច្រើន អាចបណ្ដាលឱ្យមានកើតជាតិស្ករក្នុងឈាម។ ហើយនេះជាដើមហេតុដែលអ្នកជំនាញទឹកនោមផ្អែម តែងណែនាំអ្នកជំងឺឱ្យកាត់បន្ថយញុំាបាយសក្នុងបរិមាណតិច ឬញុំាជាប្រភេទអង្ករសម្រូបជំនួសវិញ។
៣. ប៉ាស្តា (Pasta)៖ ជាទូទៅប៉ាស្តា ត្រូវបានបង្កើតឡើង ដោយប្រើម្សៅពណ៌ស និងម្សៅចម្រាញ់ ដោយប្រភេទម្សៅទាំង២នេះ អាចបណ្តាលឱ្យមានការហូរចូលយ៉ាងលឿននៃកម្រិតជាតិស្ករក្នុងឈាមនៃរាងកាយទាំងមូល។ ចំពោះអ្នកសម្រកទម្ងន់ និងកើតជំងឺទឹកនោមផ្អែម គួរកាត់បន្ថយ ឬចៀសវាងអាហារប្រភេទនេះ សូម្បីតែប្រភេទមីកញ្ចប់ក៏មិនល្អសម្រាប់សុខភាពដែរ។
៤.Cereal៖ ប្រភេទ Cereal គឺជាជម្រើសអាហារពេលព្រឹកដ៏ល្អក្នុងការផ្តល់នូវប្រភេទប្រូតេអ៊ីន និងវីតាមីន ខណៈប្រភេទអាហារមួយមុននេះ ជាទូទៅគេលាយប្រភេទនំ គ្រាប់ធញ្ញជាតិ ជាមួយនឹងទឹកដោះគោ។ ដោយឡែក ចំពោះអ្នកសម្រកទម្ងន់ និងអ្នកជំងឺទឹកនោមផ្អែម អាចនឹងមិនត្រូវជាមួយអាហារប្រភេទនេះទេ ដោយហេតុថា ការកម្រិតជាតិស្ករនៅក្នុងអាហារមួយមុខនេះ។
ជារួមមកវិញ ចំពោះរបបអាហារដែលបានរៀបរាប់ខាងលើនេះ សុទ្ធសឹងតែជារបបអាហារដែលបង្កឱ្យអ្នកទទួលទានកើនឡើងជាតិស្ករក្នុងឈាមដោយមិនដឹងខ្លួន។ ហេតុដូច្នេះ ជាការណែនាំគួរតែព្យាយាមញុំាក្នុងបរិមាណសមល្មមណាមួយ បន្ថែមជាមួយនឹងរបបអាហារដែលល្អក្នុងការជួយទ្រទ្រង់ដល់សរីរាង្គទាំងមូលមានតែជាក្រុមបន្លែ ផ្លែឈើ ដែលពុំសូវមានជាតិផ្អែមខ្លាំង និងប្រភេទសាច់សម្បូរទៅដោយសារជាតិខ្លាញ់អូមេហ្គា៣៕
អត្ថបទដោយ៖ ប៉ាវ ភក្តី