អាស្រ័យហេតុនេះ ដើម្បីជួយស្តារសុខភាពផ្លូវចិត្តឱ្យល្អប្រសើរឡើងវិញ របបអាហារល្អៗទាំង3នេះ អាចជួយបងប្អូនបាន៖

1.អាហារសម្បូរវីតាមីន B12 និងអាស៊ីតហ្វូលិក (folate)

អាស៊ីតហ្វូលិកជាធម្មតាមាននៅក្នុងសណ្តែក និងបន្លែបៃតង និងវីតាមីន B12 ដែលភាគច្រើនមាននៅក្នុងសាច់ត្រី ស៊ុតស ទ្រូងបក្សី និងទឹកដោះគោ ត្រូវបានគេរកឃើញថា វាមានសមត្ថភាពខ្ពស់ក្នុងការ ជួយការពារជំងឺនៃប្រព័ន្ធសរសៃប្រសាទកណ្តាល ជួយគ្រប់គ្រងដល់ដំណើរការស្ត្រេសតានតឹង ពង្រឹងមុខងារខួរក្បាល បញ្ចៀសនូវបញ្ហារោគសញ្ញានៃជំងឺធ្លាក់ទឹកចិត្ត និងជំងឺវង្វេង។

2.អាហារសម្បូរសារជាតិ សេលេញ៉ូម (selenium)

សេលេញ៉ូម (selenium) គឺជា សារធាតុប្រឆាំងអុកស៊ីតកម្មដ៏ខ្លាំងក្លាដែលអាចការពារកោសិកាខួរក្បាល ទប់ស្កាត់ការរលាក ជួយគ្រប់គ្រងការរំលាយអាហារ សំយោគ DNA បញ្ចូនទៅកាន់ប្រព័ន្ធប្រសាទបានយ៉ាងល្អ។ ដោយនេះ ជាកត្តាសំខាន់មួយជួយឱ្យមុខងារខួរក្បាលការល្អ កាត់បន្ថយបញ្ហាស្ត្រេសតានតឹងក្នុងចិត្ត បង្ការឱ្យជួបវិបត្តិផ្លូវចិត្តផ្សេងៗទៅថ្ងៃខាងមុខ។ សារធាតុពិសេសមួយនេះ ជាទូទៅត្រូវបានគេរកឃើញសម្បូរខ្លាំងនៅក្នុងគ្រាប់ធញ្ញជាតិដូចជា អាល់ម៉ុន សណ្តែកសៀង សណ្តែកដី អង្ករសំរូប...។ ក្រៅពីនេះក៏មាននៅក្នុងអាហារមួយចំនួនទៀតដូចជា សាច់គ្មានខ្លាញ់ (សាច់ជ្រូកគ្មានខ្លាញ់ សាច់មាន់ ឬមាន់ទួរគី) ទឹកដោះគោមានជាតិខ្លាញ់ទាប និងអាហារសមុទ្រ (អយស្ទ័រ ក្តាម ត្រីសាឌីន និងសាច់ត្រីគ្រប់ប្រភេទ)។

3. វីតាមីន D

វីតាមីន D មានសារៈសំខាន់ខ្ពស់សម្រាប់សុខភាពផ្លូវចិត្ត ការពារកុំឱ្យប្រឈមនឹងវិបត្តិផ្លូវចិត្ត ទប់ស្កាត់កើតឡើងកម្រិតតានតឹងក្នុងកោសិការាងកាយ។ សារជាតិវីតាមីន D ភាគច្រើនមានផ្ទុកនៅក្នុង ទឹកដោះគោ ស៊ុត ត្រី សាច់ ថ្លើមសត្វ និងមាននៅក្នុងអយស្ទ័រផងដែរ។