មនុស្សភាគច្រើនគិតថាក្តីសុខជាការមានលុយច្រើន ឡានទំនើប និងផ្ទះធំ...មែនហើយ! របស់ទាំងអស់នេះពិតជាសំខាន់ បើអ្នករង់ចាំទាល់តែមានរបស់ទាំងអស់នេះបានសប្បាយចិត្ត លុះត្រាអ្នកកើតមកត្រកូលអ្នកមាន ហើយតើអ្នកចំណាយពេលប៉ុន្មានឆ្នាំដើម្បីធ្វើក្តីស្រមៃឱ្យក្លាយជាការពិត? អ្នកច្បាស់ជាអង្គុយតូចចិត្តតូចថ្លើមជីវិតរបស់ខ្លួនកើតមកមិនល្អដូចគេ។ ពេលអ្នកចំណាយពេលតូចចិត្តបែបនេះ បានអ្វីមកទេ? ចម្លើយគឺអត់។ ដូច្នេះហើយ ការធ្វើរឿង ៣នេះ ជីវិតរបស់អ្នកនឹងស្រូបទាញតែក្តីសុខចូលក្នុងជីវិត។
១. ពាក្យថា Kaizen ជាគំនិតរបស់ជនជាតិជប៉ុនដែលមានន័យថា “ចូលធ្វើការផ្លាស់ប្តូររឿងតូចៗ” ជនជាតិជប៉ុនបានស្វែងយល់ថា រាល់ការផ្លាស់ប្តូរកើតចេញពីការកែលម្អរឿងតូចៗ ជាមុន ទើបមានការផ្លាស់ប្តូរធំកើតឡើង។ ពេលអ្នកប្រកាន់យកផ្នត់គំនិត Kaizen អ្នកនឹងមានការលើកទឹកចិត្តខ្លួនឯងដើម្បីកែលម្អខ្លួនឯងឱ្យរីកលលូតលាស់ម្តងបន្តិចៗ ដើម្បីយកឈ្នះលើបញ្ហាប្រឈមក្នុងជីវិត ហើយចុងក្រោយគឺអ្នកនឹងទទួលបានជោគជ័យមិនខានទេ។ បើអ្នកចង់សម្រេចក្តីស្រមៃធំមួយ អ្នកត្រូវព្យាយាមធ្វើរឿងតូចៗ ដូចជាថែសុខភាពផ្លូវកាយ ថែផ្លូវចិត្តដោយសមាធិ ហើយបំបែកគោលដៅចេញជាតូចៗ អ្នកនឹងស្រួលធ្វើការឱ្យមានលទ្ធផល។ ចូរអ្នកអបអរការផ្លាស់ប្តូរតូចៗ អ្នកនឹងឈ្នះមិនខាន។
២. ទស្សនជីវិតរបស់ជប៉ុន Mono no Aware មានន័យថា "សម្រស់នៃភាពមិនទៀងទាត់”។ គំនិតរបស់ជប៉ុនមួយនេះបានបង្រៀនយើងថា គ្មានអ្វីនៅលើលោកនេះមានភាពស្ថិតស្ថេររហូតទេ យើងត្រូវចេះពេញចិត្តចំពោះធម្មជាតិដ៏ខ្លីក្នុងជីវិតនេះ។ ពេលអ្នកទទួលស្គាល់ភាពមិនទៀងទាត់នៃជីវិតហើយ អ្នកនឹងទទួលបានអារម្មណ៍ចេះអាណិតអាសូរ កាន់តែស្គាល់ពីខ្លួនឯង និងដឹងគុណពេលវេលានីមួយៗ ដែលបានចូលមកកាន់ជីវិតរបស់អ្នក។ ពេលអ្នកអានដល់ចំណុចនេះ តើអ្នកមានអារម្មណ៍ស្ងប់ស្ងាត់ទេ? ទស្សនវិជ្ជាជីវិតបានបង្រៀនខ្លួនអ្នកថា ដំណើររបស់ធម្មជាតិមិនទៀងទាត់ទេ គ្រាន់តែអ្នកទទួលយកការពិតនៃជីវិតនេះថា វាមិនទៀងទាត់ ហើយខំប្រឹងបន្តធ្វើដំណើរទៅមុខបានហើយ។
៣. អ្នកបានឃើញទម្លាប់ជប៉ុនមួយដែរទេគឺទម្លាប់មានក្តីអាណិតអាស៊ូចំពោះអ្នកដទៃ។ មកពីប្រជាជនជប៉ុនប្រកាន់គំនិត Omoiyari ដែលមានន័យថា “ការយល់ចិត្ត និងការអាណិតអាសូរចំពោះអ្នកដទៃ” នេះជាគោលគំនិតជីវិតរបស់ជនជាតិជប៉ុនដែលអាចជួយផ្លាស់ប្តូរជីវិតរបស់អ្នកឱ្យមានក្តីសុខ។ គំនិតនេះស្របតាមគំនិតរបស់ព្រះពុទ្ធគឺមេត្តាករុណានេះឯង។ ពេលអ្នកមានបេះដូងមេត្តាដល់ជីវិតដទៃ អ្នកបេះដូងរបស់អ្នកកាន់តែមានក្តីសុខនិងបង្កើនថាមពលច្រើនឡើង។ ពេលអ្នកសម្លឹងមើលនរណាម្នាក់ដូចជាជនក្រីក្រ ជនរើសអេតចាយ និងជនសុំទាន... បេះដូងរបស់អ្នកនឹងកើតក្តីអាណិតអាស៊ូចំពោះពួកគេមិនខានទេ។ អារម្មណ៍មេត្តានិងអារម្មណ៍ករុណាបូកបញ្ចូលគ្នាក៏ក្លាយជាអាម្មណ៍មានក្តីសុខបំផុតក្នុងជីវិតរបស់អ្នក៕ អត្ថបទដោយ៖ ទ្រ សុភាព
លោកអ្នកអានសៀវភៅ លំហូរចិត្ត អ្នកអាចទិញតាមហេងឆេង២៤នេះ https://t.me/hangchhengH24 (កម្រាស់២៨០ទំព័រ និងមានសាច់បុគ្គលឆ្នើមៗនៅខ្មែរ១០នាក់)