កាលពីថ្ងៃទី២៥ ខែឧសភា ឆ្នាំ២០២២ ម្សិលមិញនេះនាយកដ្ឋានគ្រប់គ្រងជំងឺឆ្លង CDC ថៃបានប្រកាសដំណឹងដល់អ្នកដំណើរទាំងអស់ដែលចូលមកប្រទេសថៃឱ្យបានដឹងថា ពេលធ្វើដំណើរមកដល់ព្រលានយន្តហោះសុវណ្ណភូមិថៃ អ្នកដំណើរទាំងអស់ត្រូវធ្វើតេស្តរកជំងឺអុតស្វា បើមានករណីសង្ស័យ ៨ចំណុចដូចខាងក្រោមអ្នកដំណើរត្រូវចត្តាឡីស័កនៅដាច់ដោយឡែកពីគេ និងរងចាំលទ្ធផលតេស្ត ២ ទៅ ៤ថ្ងៃសិន។
ជាមួយគ្នានេះដែរ លោក Opas Karnkawinpong ប្រធាននាយកដ្ឋានគ្រប់គ្រងជំងឺ (DDC) បាននិយាយថា អ្នកដំណើរទាំងអស់ ពេលចូលមកដល់ប្រលានយន្តហោះសុវណ្ណភូមិ ថៃ ត្រូវស្កេន QR កូដដើម្បីយក "កាតតេស្តសុខភាព" ទៅបំពេញ។ ក្នុងករណីអ្នកដំណើរណាម្នាក់មានអាការៈ ឈឺបំពង់ក កម្តៅ ៣៨ អង្សាសេឬលើសនេះ ឈឺក្បាល ឈឺសាច់ដុំ ឈឺខ្នង កន្ទួលលើរាងកាយ ពងបែក និងស្នាមរបួស គឺតម្រូវឱ្យអ្នកដំណើរនោះនៅដាច់ដោយឡែកពីគេ និងរងចាំលទ្ធផលតេស្ត ២ទៅ ៤ថ្ងៃ ទើបអាចធ្វើដំណើរទៅទីតាំងដែលចង់ទៅបាន។
មួយវិញទៀត អាជ្ញាធរថៃរឹតបន្តឹងកាន់តែខ្លាំង ចំពោះអ្នកដំណើរដែលមកពីតំបន់ហានិភ័យទាំង២គឺ អឺរ៉ុបខាងត្បូង និងអាហ្វ្រិក និងមិនអនុញ្ញាតឱ្យអ្នកដំណើរទាំងអស់នាំយកសត្វចិញ្ចឹមមកជាមួយនោះទេ៕
ប្រភព៖ Bangkokpost