យើងដឹងហើយថាស្រាជាគ្រឿងមួយដែលអ្នកជំនាញក៏ដូចជា ខាងក្រសួងប្រកាសក្ដែងៗឱ្យមានការតមស្រា បារី ទាំងមុននិងក្រោយចាក់វ៉ាក់សុំាង ដើម្បីឱ្យប្រសិទ្ធភាពវ៉ាក់សុំាងរក្សាបានគុណភាពល្អ ពិសេសសម្រាប់បងប្អូនដែលកំពុងត្រៀមចាក់វ៉ាក់សុំាងតាមខេត្ត។
ដោយឃើញថាប្រជាជនយើងមួយចំនួនចូលចិត្ត ទទួលទានស្រា រហូតដល់បងប្អូនខ្លះដាច់មិនបានហេតុនេះ ដើម្បីសុវត្ថិភាពទាំងអស់គ្នាក្រោយចាក់វ៉ាក់សុំាង ក៏ដូចជាដើម្បីរក្សាប្រព័ន្ធភាពសុំាឱ្យនៅខ្លាំង នៅពេលដែលផ្ដាច់ស្រានេះ។
វិធីសាស្រ្តទាំងនោះរួមមាន៖
១.ស្វែងយល់ឱ្យច្បាស់ពីផលប៉ះពាល់នៃការទទួលទានគ្រឿងស្រវឹង
បុគ្គលមួយចំនួនដឹងត្រឹមថាស្រាប៉ះពាល់សុខភាព តែមិនបានដឹងឱ្យស៊ីជម្រៅឡើយនៃការទទួលរងគ្រោះយ៉ាងធ្ងន់នាពេលបច្ចុប្បន្ន(គ្រោះថ្នាក់ចរាចរណ៍ អំពើរហិង្សាជាដើម)និងពេលអនាគត រហូតបុគ្គលមួយចំនួនធ្លាក់ខ្លួនឈឺ បាត់បង់របស់ជាទីស្រលាញ់ជុំវិញខ្លួន ពិសេសសុខភាពទ្រុឌទ្រមទើបនឹកភ្ញាក់ខ្លួនក៏មាន។
ហេតុនេះបើចង់ឱ្យខ្លួនឯងរអើមនឹងស្រា អ្នកត្រូវដឹងថាកម្រិតនៃការប៉ះពាល់របស់ គ្រឿងស្រវឹងដែលផ្ដាំតាំងពីដូនពីតា ឱ្យជៀសឆ្ងាយនេះ ខ្លាំងយ៉ាងណាជាមុនសិន។
២.មានជុំ មានផឹក
មិត្តភក្តិគឺសំខាន់ តែអ្នកមិនត្រូវចំណាយពេលស្ទើររាល់ថ្ងៃកាន់កែវស្រា ហើយសើចសប្បាយជាមួយមិត្តភក្តិស្ទើររាល់ថ្ងៃឡើយ ព្រោះថ្ងៃក្រោយពេលឈឺ គឺយើងខ្លួនឯងគ្រួសារ ជាអ្នករង់ទុក្ខ។ក្នុងន័យនេះគឺសូមជៀសវាងការជួបជុំ។
យូរៗជុំគ្នាម្ដង ហើយបើអាចមានតែឬកាហ្វេជំនួសស្រាគឺកាន់តែល្អ ដើម្បីសុខភាពបវរទៅថ្ងៃមុខ។
៣.មានគោលដៅច្បាស់លាស់ចំពោះជីវិតខ្លួនឯង
មនុស្សគ្រប់រូបនៅពេល មានគោលដៅមានក្ដីស្រមៃប្រចាំខ្លួនច្បាស់លាស់ នឹងរៀនលះបង់ការចាយពេលលើរឿងដែលបង្កផលប៉ះពាល់ដល់ខ្លួនគេនិងអ្នកក្បែរខ្លួនជាមិនខាន ដើម្បីមានពេលគ្រប់គ្រាន់ទៅធ្វើរឿងដែលជួយជំរុញឱ្យក្ដីស្រមៃឫគោលដៅរបស់គេនោះសម្រេចបានឆាប់ដូចក្ដីប្រាថ្នា។
ដូច្នេះអ្នកត្រូវប្រកាន់ខ្ជាប់នូវការមានគោលដៅប្រចាំជីវិតឱ្យបាន ហើយចាត់ទុកគោលដៅនោះជាធំ កុំសម្ងំវក់ជាមួយគ្រឿងស្រវឹងដែលធ្វើឱ្យយើងចាប់គោលដៅមិនជាប់ ។
៤.គិតគូដល់ហិរញ្ញវត្ថុ
តក់ៗពេញបំពង់ លុយកាក់ដែលហូរចេញពីហោរប៉ៅតក់ក៏អាចអស់ដូជគ្នាដែរ។ អ្នកដឹងហើយថាលុយពិបាករក ហើយកាន់តែពិបាកទៀតបើយើងចំណាយខុសខ្ទង់ ពិសេសចំណាយលើរបស់ដែលរួមចំណែកបំផ្លាញសុខភាព សុភមង្គលនេះតែម្ដង។
សាកស្រមៃមើលបើអ្នកដកលុយចំណាយលើស្រានោះមក សន្សំហើយយកទៅវិនិយោគឬទិញរបស់សម្រាប់ខ្លួនឯងឬមនុស្សជាទីស្រលាញ់ លុយយើងនឹងកើនឡើង ហើយមនុស្សក្បែរយើងនឹងរីករាយបែបណា។
៥.ស្វែងរកភេសជ្ជៈដែលអ្នកចូលចិត្តនិងមិនប៉ះពាលដល់សុខភាព
មានភេសជ្ជៈដែលខ្លួនចូលចិត្តប្រចាំជីវិត គឺអាចជួយ អ្នកយ៉ាងធំធេញ ពិសេសគឺអាចជំនួសស្រាបាន។ប្ដូរពីការគាស់ស្រាញឹក មកជាធ្វើទឹកផ្លែឈើញុំា ដើម្បីបានរាងស្អាត ស្បែកស្រស់ថ្លាវិញម្ដង នោះអ្នកនឹងមានអារម្មណ៍មោទនភាពចំពោះខ្លួនឯង។ហើយនេះក៏ជាការបង្ហាញការយកចិត្តទុកដាក់និងការស្រលាញ់ខ្លួនប្រាណយើងមួយផ្នែកធំដែរ។
៦.គិតដល់មនុស្សជាទីស្រលាញ់របស់អ្នកនិងអនាគតខ្លួនឯងផ្ទាល់
នឹកគិតដល់សេចក្ដីស្រលាញ់ដែលអ្នកដទៃធ្លាប់ផ្ដល់ឱ្យអ្នក ហើយនឹកគិតដល់រូបកាយរបស់អ្នកនិងមាតាបិតាដែលធ្លាប់ស្រលាញ់ធ្លាប់ថ្នមថ្នាក់ពីមុនមក។បើអ្នកនៅតែបន្តមិនយូរមិនឆាប់ឥទ្ធិពលមិនល្អនៃស្រានោះនឹងលេចជារូបរាង ហើយអ្នកអាចនឹងស្ដាយក្រោយពេញមួយជីវិត។
ស្រលាញ់ខ្លួនឯងស្រលាញ់គ្រួសារនិងសង្គម សូមនៅឱ្យឆ្ងាយពីគ្រឿងស្រវឹង ហើយយើងដឹងហើយថាមនុស្សមិនតិចទេជារៀងរាល់ឆ្នាំត្រូវរង់គ្រោះថ្នាក់ចរាចរណ៍ និងបាត់បង់ជីវិតក៏មកពីអាវុធត្រជាក់នេះដែរ សូមកុំបណ្ដោយខ្លួនតទៀតអី។
៧.កាត់បន្ថយការទិញគ្រឿងស្រវឹងមកស្តុកទុក
នេះជាចំណុចសំខាន់បំផុត ការមិនស្តុកទុក ក្នុងផ្ទះក៏ជាកត្តាជំរុញឱ្យអ្នក បំភ្លេចគ្រឿងស្រវឹងនេះបានផងដែរ។ ហេតុនេះអ្នកអាចជំនួសមកជាភេសជ្ជៈល្អៗដែលផ្ដល់ជាតិទឹកខ្ពស់ដល់រាងកាយ ឫជំនួយផ្នែកផ្សេងៗនៃសុខភាព ដែលមិនប៉ះពាល់ដល់សុខភាពវិញ។ ចំពោះភេសជ្ជៈដែលជំនួសនោះ ត្រូវជ្រើសរើសដោយប្រុងប្រយ័ត្ន ព្រោះផលិតផលខ្លះអាចមានជាតិស្ករខ្ពស់ ហើយអ្នកមិនបានបញ្ចេញថាមពលទៀតជាហេតុនាំឱ្យកើតជំងឺផ្សេងៗ។
ស្រលាញ់ខ្លួនឯងឱ្យច្រើនៗ គិតគូដល់គ្រួសារនិងប្រទេសជាតិ សូមកាត់បន្ថយការទទួលទានគ្រឿងស្រវឹងឱ្យបាន។ពិសេសគឺមុននិងក្រោយចាក់វ៉ាក់សុំាង សូមតមឱ្យបានដើម្បីប្រសិទ្ធភាពវ៉ាក់សុំាងរក្សាបានគុណភាពខ្ពស់ ទប់ទល់វីរុសកូវីដ១៩បានល្អ។
ចំពោះបារីក៏សំខាន់ផងដែរក្នុងដំណាក់កាលនៃការពារខ្លួនពីជំងឺកូវីដ១៩នេះ ហើយជាគន្លឹះខ្លីៗបន្ថែមក្រៅពីវិធីផ្ដាច់ផ្ដាចស្រាខ្លះអាចអនុវត្តន៍រួមគ្នាបាននោះ បងប្អូនអាចកាត់ផ្ដាច់តាមរយៈ ការញុំាស្ករគ្រាប់ជំនួសនៅពេលដែល ចង់ជក់ ទំពាស្ករកៅស៊ូ ញុំាទឹកនិងអាហារមានជីវជាតិឱ្យបានច្រើន ធ្វើលំហាត់ប្រាណ ឬធ្វើការងារឱ្យរវល់ មួយវិញទៀត សូមនឹកគិតដល់ផលប៉ះពាល់នៃបារី ដល់សុខភាពដូចជា បំផ្លាញសួត ថ្លើម ក្រពះពោះវៀនបន្តិចម្ដងៗ។បើតាមការស្រាវជ្រាវរបស់អ្នកជំនាញ ចំពោះបុគ្គលដែលជក់បារីគឺប្រឈមការងាយឆ្លងកូវីដ១៩បំផុត ព្រោះប្រព័ន្ធភាពសុំា ចុះខ្សោយស្រាប់។
គួរជម្រាបដែរថាវិធីខាងលើមិនចាំបាច់អនុវត្តន៍ទាំងអស់ក៏បាន ស្រេចលើអ្នកចូលចិត្ត។ដូចនេះសូមព្យាយាមផ្ដាច់នូវទម្លាប់មិនល្អទាំង២ខាងលើ ដើម្បីសុខភាពល្អចំពោះមុខនិងទៅថ្ងៃអនាគត។