បញ្ហាគាំងបេះដូង បានសម្លាប់ពលរដ្ឋខ្មែរជាច្រើននាក់ ហើយអ្នកគាំងបេះដូងអាចបណ្តាលឱ្យស្លាប់ភ្លាមៗ។ អ្នកទាំងអស់គ្នាប្រហែលជាធ្លាប់លឺហើយ អ្នកខ្លះមើលឃើញមាឌមាំ សុខភាពហាក់ល្អ តែបែរជាគាំងបេះដូង ស្លាប់ភ្លាមៗសឹងមិនគួរឱ្យជឿ។ ដោយសារតែបញ្ហាគាំងបេះដូង ជាបញ្ហាជួបប្រទះញឹកញាប់ Healthy Cambodia នឹងលើកយកបញ្ហាដែលនាំឱ្យកើតជំងឺបេះដូង និងឈានដល់មានបញ្ហាគាំងបេះដូង និងវិធីការពារមួយចំនួនចៀសវាង ស្លាប់ដោយសារគាំងបេះដូង។
ជំងឺបេះដូងអាចមានច្រើនប្រភេទ តែយើងនឹងលើកយកតែជំងឺស្ទះសរសៃឈាមបេះដូងមកបង្ហាញលោកអ្នកអាន ដើម្បីជាចំណេះដឹង និងចេះការពារខ្លួនឯង។
អ្វីជាជំងឺស្ទះសរសៃរឈាមបេះដូង? យោងតាមមន្ទីរពេទ្យកាល់ម៉ែតឱ្យពន្យល់ថា គឺជាការខូច ឬស្លោកសាច់ដុំបេះដូងស្រួចស្រាវបណ្តាលមកពីសរសៃឈាមដែលទៅចិញ្ចឹមបេះដូង (Coronary artery)។ វា ជាជំងឺដែលមានគ្រោះថ្នាក់ធ្ងន់ធ្ងរដល់អាយុជីវិត, ត្រូវការការព្យាបាលពិសេស និងបន្ទាន់ (Absolute medical emergency) ដើម្បីកាត់បន្ថយអាត្រាមរណភាព។
ហើយមូលហេតុសំខាន់ធ្វើឱ្យកើតជំងឺស្ទះសរសៃឈាមបេះដូង ភាគច្រើន (លើសពី៩០%) បណ្តាលមកពីការកកជាតិខ្លាញ់តាមសរសៃឈាមបេះដូង (Atherosclerosis)។
ចំណុចដែលគួរឱ្យកត់សម្គាល់ គឺកើតឡើងចំពោះក្រុមមនុស្សដែលប្រឈមខ្លាំង៖ វ័យចំណាស់ (ប្រុស >៤៥ឆ្នាំ, ស្រី >៥៥ឆ្នាំ), លើសទម្ងន់, មានជំងឺលើសឈាម, មានជំងឺលើសជាតិស្ករ/ទឹកនោមផ្អែម, មានជំងឺលើសជាតិខ្លាញ់ (High cholesterol), ពិសារបារី, ពិសារស្រាច្រើន និង ប្រវត្តិក្រុមគ្រួសារមានជំងឺស្ទះសរសៃឈាមបេះដូង។
សម្រាប់រោគសញ្ញាបង្ហាញថា អ្នកកើតជំងឺនេះ គឺ ឈឺទ្រូងផ្នែកខាងមុខខ្លាំងរយៈពេលយូរ (លើសពី៣០នាទី) ហើយអាចសាយភាយទៅ ក, ដើមដៃ, ស្មា, ឬថ្គាម។ រោគសញ្ញារួមផ្សំផ្សេងទៀត៖ បែកញើស, ឡេះឡះ និងថប់ដង្ហើម ឬហត់។
ចំណែកផលវិបាកវិញ គឺ៖ វិបត្តិ ចង្វាក់បេះដូងធ្ងន់ធ្ងរ (Arrhythmia), ខ្សោយបេះដូង ( Heart failure), ចុះសម្ពាធឈាមធ្ងន់ធ្ងរ (Shock) និង គាំងបេះដូង -ស្លាប់ (Sudden death)។
សូមបញ្ជាក់សម្រាប់វិធីការពារជំងឺកាចសាហាវនេះ យើងអាច៖
- ហាត់ប្រាណឲ្យបានទៀងទាត់ ៣០នាទីក្នុង១ថ្ងៃ, ៥ថ្ងៃក្នុង១សប្តាហ៍
- ឈប់ពិសារបារី
- កាត់បន្ថយគ្រឿងស្រវឹងឲ្យបានច្រើនបំផុត
- ជៀសវាងអាហារប្រៃហួសប្រមាណ
- កាត់បន្ថយអាហារសំបូរជាតិខ្លាញ់, សាច់
- កាត់បន្ថយស្ថានភាពតានតឹងអារម្មណ៍ (Stress)
- គ្រប់គ្រងសម្ពាធឈាមឲ្យបានល្អប្រសិនបើលើសឈាម
- គ្រប់គ្រងជាតិស្ករឲ្យបានត្រឹមត្រូវប្រសិនបើលើសជាតិស្ករ ទៅតាមបទបញ្ជារបស់គ្រូពេទ្យ
- រក្សាទម្ងន់ឲ្យបានសមស្រប កុំឲ្យលើសទម្ងន់
- ជួបពិគ្រោះជាមួយគ្រូពេទ្យឯកទេសឲ្យបានទៀងទាត់។
ដូច្នេះប្រសិនបើបងប្អូនប្រជាពលរដ្ឋមានអាការៈ និងរោគសញ្ញាដូចបានជម្រាបជូនខាងលើ សូមអញ្ជើញមកពិគ្រោះជាមួយគ្រូពេទ្យជំនាញឯកទេសបេះដូង ដើម្បីស្វែងរករោគវិនិច្ឆ័យ និងការព្យាបាលជំងឺនេះឲ្យបានទាន់ពេលវេលា ដោយបច្ចេកវិទ្យាទំនើប ប្រកបដោយប្រសិទ្ធភាពខ្ពស់។