តើអ្នកចំណាយពេលប៉ុន្មានម៉ោងក្នុងមួយថ្ងៃសម្រាប់កូនៗរបស់អ្នក បន្ទាប់ពីធ្វើការងាររួច? ជាទូទៅបន្ទាប់ពីធ្វើការរួចឪពុកម្ដាយប្រហែលជាចំណាយពេលផ្ដោតទៅលើការធ្វើម្ហូប ការរៀបចំផ្ទះសម្បែង ការអានសៀវភៅ ការមើលទូរទស្សន៍ ការលេងទូរស័ព្ទ ជាជាងការចំណាយពេលវេលានៅក្បែរកូនៗទៅវិញ។ ហើយភាគច្រើនទៀតឪពុកម្ដាយមានការមមាញឹកនឹងការងារច្រើន គ្មានពេលមើលថែកូន ទុកកូនឱ្យម្ដាយមើលថែជំនួសវិញ ជាហេតុធ្វើឱ្យកូនៗខ្វះនូវភាពកក់ក្ដៅពីឪពុកម្ដាយ។
ជាមួយគ្នានេះ អ្នកចិត្តសាស្រ្ត Nataliya Sirotich បានពន្យល់ថា ប្រសិនបើអ្នកអនុវត្តន៍ក្បួនច្បាប់ ៣ នាទីនេះកូនរបស់អ្នកនឹងទទួលបាននូវភាពកក់ក្តៅ និងទំនុកចិត្តពីអ្នកជាឪពុកម្ដាយជាមិនខាន។
ប្រសិនបើឪពុកម្ដាយសម្រេចចិត្តអនុវត្តន៍ច្បាប់នេះដោយប្រើរយៈពេល ៣ នាទីឱ្យបានត្រឹមត្រូវ ហើយឈានដល់កម្រិតមួយនៃការយល់ដឹងពេញលេញជាមួយកូន នោះវានឹងទទួលបានប្រសិទ្ធភាពខ្ពស់សម្រាប់អ្នក!
១‑តើអ្វីទៅជាច្បាប់ ៣ នាទី?
ច្បាប់នេះចែងថា អ្នកត្រូវតែចំណាយពេលជួបកូនរបស់អ្នករាល់ថ្ងៃក្នុងរយៈពេល ៣នាទី ដោយផ្ដោតទៅលើការផ្ដល់នូវភាពកក់ក្តៅ និងក្ដីស្រលាញ់។ ទន្ទឹមនឹងគ្នានេះ អ្នកត្រូវចំណាយពេល ៣ នាទីដើម្បីឱបកូន រួចសួរគេថា តើកូនមានកើតអ្វីទេ ពេលនៅឆ្ងាយពីម្ដាយ? ដែលច្បាប់នេះមានសារៈសំខាន់នៅពេលអ្នកទៅទទួលកូនរបស់អ្នកពីសាលារៀន ឬពេលអ្នកត្រលប់មកពីធ្វើការវិញ។
២‑ហេតុអ្វីអ្នកចាំបាច់ត្រូវអនុវត្តន៍ច្បាប់មួយនេះ?
យោងទៅតាមការលើកឡើងរបស់ អ្នកចិត្តសាស្រ្ត បានអះអាងថា ក្នុងកំឡុងពេលប៉ុន្មាននាទីដំបូងបន្ទាប់ពីអ្នកបានជួបកូនរបស់អ្នក ពួកគេនឹងប្រាប់អ្នកនូវព័ត៌មានទាំងអស់ដែលពួកគេអាចចងចាំបាន។
ផលវិបាក ប្រសិនបើអ្នកអើពើមិនអនុវត្តន៍ច្បាប់ ៣នាទីនេះទេ វានឹងធ្វើឱ្យកូនរបស់អ្នកមានអត្ដចរិតប្រែប្រួល។ ព្រោះថានៅពេលកូនរបស់អ្នកមិនមានឱកាសប្រាប់រឿងរ៉ាវរបស់ពួកគេមកកាន់អ្នក វាធ្វើឱ្យពួកគេមិនអាចបង្ហាញអ្វីដែលពួកគេចង់ប្រាប់ នោះធ្វើឱ្យពួកគេនឹងលាក់ទុកក្នុងចិត្តមិនហ៊ានបញ្ចេញ។ ក្នុងករណីនេះឪពុកម្ដាយនឹងខកខាននូវរឿងសំខាន់ៗដែលកូនអ្នកចង់ប្រាប់។
មួយវិញទៀត អ្នកមានដែលសង្កេតមើលទេ នៅពេលដែលកូនរបស់អ្នកមកពីសាលារៀន ឬដើរលេងវិញ ពួកគេតែងតែមានរឿងនិយាយប្រាប់មកកាន់អ្នករហូត តើអ្នកជាម្ដាយធ្លាប់ជួបទេ? បើជួយ តើអ្នកបានយកចិត្តទុកដាក់ស្ដាប់ពួកគេនិយាយទេ? បើមិនបានស្ដាប់ទេ ចូលអ្នកដែលបានអានអត្ថបទនេះហើយត្រូវអនុវត្តន៍ច្បាប់ ៣ នាទីនេះភ្លាម។
ចំណាំ ច្បាប់ ៣ នាទីនេះ មិនមែនមានន័យថាអ្នកគួរតែចំណាយពេលត្រឹមតែ ៣ នាទីរៀងរាល់ថ្ងៃជាមួយកូនៗរបស់អ្នកនោះទេ។ ច្បាប់នេះគ្រាន់តែចង់បង្ហាញថា អ្នកត្រូវចំណាយពេល ៣ នាទីជាមួយកូនអ្នកភ្លាមៗ បន្ទាប់ពីអ្នកបានជួបពួកគេ ហើយចំណាយពេលស្ដាប់អ្វីគ្រប់យ៉ាងដែលកូនអ្នកចង់ប្រាប់អ្វីមួយមកកាន់អ្នកជាឪពុកម្ដាយ។
អត្ថបទស្រាវជ្រាវដោយ៖ម៉ាង វិសិដ្ឋារតន៍